மரத்தில் கார் மோதி 2 பேர் பலி

தஞ்சையை அடுத்த ரெட்டிப்பாளையத்தை சேர்ந்தவர் பீட்டர் மகன் ஜேசுதாஸ் (வயது 28). அதே பகுதியை சேர்ந்தவர் ஆறுமுகம் மகன் குணசேகரன் (45). ஜேசுராஜ் மகன் டென்னிஸ் (28), பாக்கியராஜ் (35). இவர்கள் 4 பேரும் நண்பர் ஒருவரின் மனைவியின் பிறந்த நாளை முன்னிட்டு ஹோட்டலுக்கு சாப்பிட சென்றனர். சாப்பிட்டுவிட்டு காரில் தஞ்சை இந்திராநகர் வழியாக வீட்டிற்கு திரும்பிக்கொண்டிருந்தனர். அப்போது கார் டிரைவரின் கட்டுப்பாட்டை இழந்து எதிர்பாராத விதமாக சாலையோரத்தில் இருந்த மரத்தில் பயங்கரமாக மோதியது. இதில் ஜேசுதாஸ், குணசேகரன் ஆகியோர் சம்பவ இடத்திலேயே பரிதாபமாக இறந்தனர். பாக்கியராஜ் மற்றும் டென்னிஸ் ஆகியோர் படுகாயம் அடைந்தனர். உடனடியாக அவர்கள் தஞ்சை மருத்துவக்கல்லூரி ஆஸ்பத்திரியில் அனுமதிக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இது குறித்து தகவல் அறிந்ததும் தஞ்சை நகர போக்குவரத்து குற்ற புலனாய்வு பிரிவு போலீஸ் சிறப்பு சப் இன்ஸ்பெக்டர் தங்கராஜ் மற்றும் போலீசார் வழக்குப்பதிவு செய்து விசாரணை நடத்தி வருகிறார்கள்.