மோட்டார் சைக்கிள்களில் மோதி பள்ளத்தில் பாய்ந்த கார்-ஒருவர் பலி

காரியாபட்டி,

விருதுநகர் மாவட்டம் காரியாபட்டி அருகே உள்ள எஸ்.கடமங்குளம் கிராமத்தை சேர்ந்தவர், அழகு ராஜா (வயது 32). விவசாயியான இவர் காரியாபட்டி செல்வதற்காக தனது மோட்டார் சைக்கிளில் சென்று கொண்டிருந்தார். அப்போது மதுரையை சேர்ந்த ஷாஜகான் (39) என்பவர் ஓட்டிவந்த கார், அழகுராஜாவின் மோட்டார் சைக்கிள் மீது மோதியதில் அவர் சம்பவ இடத்திலேயே பலியானார். அழகுராஜாவிற்கு பின்னால் மதுரை அவனியாபுரத்தை சேர்ந்த சக்திகுமார் (33), மதுரையைச் சேர்ந்த பரத் (23), சிவா (29), திருமங்கலத்தை சேர்ந்த சங்கர் (23) ஆகியோர் 2 மோட்டார் சைக்கிள்களில் வந்து கொண்டிருந்தனர். அந்த மோட்டார் சைக்கிள்களிலும், அந்த கார் மோதியதுடன் பள்ளத்திலும் கவிழ்ந்தது. இந்த விபத்தில் பரத், சக்திகுமார் ஆகியோருக்கு பலத்த காயம் ஏற்பட்டது.

இதுகுறித்து தகவல் அறிந்த காரியாபட்டி போலீசார் விரைந்து வந்தனர். பலியான அழகுராஜாவின் உடலை பரிசோதனைக்காக அருப்புக்கோட்டை அரசு மருத்துவமனைக்கு அனுப்பி வைத்தனர். காயம் அடைந்த பரத், சக்திகுமார் ஆகியோரை மீட்டு சிகிச்சைக்காக மதுரை அரசு மருத்துவமனைக்கு அனுப்பி வைத்தனர்.