பாலத்தில் கார் மோதல்; மகள், மகனுடன் பெண் பலி

சிவகாசி,

பாலத்தில் கார் பயங்கரமாக மோதியதில் மகள், மகனுடன் பெண் பலியானார். 2 பேருக்கு தீவிர சிகிச்சை அளிக்கப்பட்டு வருகிறது.

காரில் பயணம்

நெல்லை மாவட்டம் திசையன்விளை அருகே உள்ள மன்னார்புரத்தை சேர்ந்தவர், ரிச்சர்ட்ராஜா (வயது 49). இவர் கோவையில் தொழில் செய்து வருகிறார். இவருடைய மனைவி மெர்லின் (44).

இவர்களுடைய மகள் ரோஷினி (15), மகன் ரோகித் (13). இவர்கள் அனைவரும் சில நாட்களுக்கு முன்பு கோவையில் இருந்து காரில் சொந்த ஊருக்கு வந்தனர்.

நேற்று முன்தினம் இரவில் ரிச்சர்ட் ராஜா குடும்பத்தினரும், அவருடைய சகோதரர் ஜான்சன் ராஜாவும் (56) காரில் கோவைக்கு புறப்பட்டனர்.

3 பேர் பலி

நள்ளிரவில் அந்த கார் கோவில்பட்டி-சாத்தூர் இடையே நள்ளிசத்திரம் அருகே வந்து கொண்டிருந்தது. அப்போது திடீரென கட்டுப்பாட்டை இழந்து ரோட்டின் ஓரத்தில் உள்ள பாலத்தில் பயங்கரமாக மோதியது.

இதில் கார் ெநாறுங்கியது. இந்த பயங்கர விபத்தை அறிந்து அக்கம்பக்கத்தினர் ஓடிவந்து பார்த்தனர். காரில் இருந்த சிறுவன் ரோகித் சம்பவ இடத்திலேயே இறந்தான். படுகாயம் அடைந்து உயிருக்கு ஆபத்தான நிலையில் மெர்லின், ரோஷினி, ரிச்சர்ட்ராஜா, ஜான்சன்ராஜா ஆகியோரை அந்த பகுதியை சேர்ந்தவர்கள் மீட்டு கோவில்பட்டி அரசு ஆஸ்பத்திரிக்கு அனுப்பி வைத்தனர். அங்கு சிகிச்சை பலன் அளிக்காமல் மெர்லின் பரிதாபமாக இறந்தார். இதனை தொடர்ந்து மற்ற 3 பேரை மேல் சிகிச்சைக்காக நெல்லை அரசு ஆஸ்பத்திரிக்கு அனுப்பி வைத்தனர். அங்கு சிறுமி ரோஷினி உயிரிழந்தார்.

தீவிர சிகிச்சை

ரிச்சர்ட்ராஜா, ஜான்சன்ராஜா ஆகியோருக்கு நெல்லை அரசு ஆஸ்பத்திரியில் தீவிர சிகிச்சை அளிக்கப்பட்டு வருகிறது.

சாலை விபத்தில் ஒரே குடும்பத்தை சேர்ந்த தாய், மகன், மகள் ஆகிய 3 பேர் பலியான சம்பவம் பெரும் சோகத்தை ஏற்படுத்தியது.

ரோகித் உடல் சாத்தூர் அரசு ஆஸ்பத்திரியில் பரிசோதனை செய்யப்பட்டு உறவினர்களிடம் ஒப்படைக்கப்பட்டது. உடலை பார்த்து உறவினர்கள் கதறியது பரிதாபத்தை ஏற்படுத்தியது. இந்த விபத்து குறித்து சாத்தூர் தாலுகா போலீசார் வழக்குப்பதிவு செய்து விசாரணை நடத்தி வருகிறார்கள்.