கார் டிரைவர் வெட்டிக்கொலை

கும்பகோணம்

தஞ்சை மாவட்டம், கும்பகோணம் அருகே பெருமாண்டி மாரியம்மன் கோவில் தெருவை சேர்ந்தவர் முருகானந்தம். இவரது மகன் தினேஷ் என்கிற தினகரன்(வயது 28). கார் டிரைவர். இவர் நேற்று மதியம் தனது மனைவியிடம் வெளியில் சென்று விட்டு வருவதாக கூறிவிட்டு சென்றார். ஆனால் நீண்டநேரமாகியும் அவர் வீடு திரும்பவில்லை.

இந்த நிலையில் கும்பகோணம் பெருமாண்டி பத்மநாதபுரம் பகுதியில் தினகரன் மர்ம நபர்களால் வெட்டி கொலை செய்யப்பட்டு கிடந்தார். இதுகுறித்து அந்த பகுதியை சேர்ந்தவர்கள் கும்பகோணம் கிழக்கு போலீசாருக்கு தகவல் தெரிவித்தனர்.

போலீசார் விசாரணை

தகவலின் பேரில் போலீசார் சம்பவ இடத்திற்கு விரைந்து வந்து தினகரனின் உடலை கைப்பற்றி பிரேத பரிசோதனைக்காக கும்பகோணம் அரசு ஆஸ்பத்திரிக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து தினகரனை வெட்டி கொலை செய்தவர்கள் யார்?, முன்விரோதம் காரணமாக இந்த கொலை நடந்ததா? அல்லது வேறு ஏதேனும் காரணமா? என விசாரணை நடத்தினர்.முதல்கட்ட விசாரணையில், தினகரனுக்கும், அவரது நண்பர்களுக்கிடையே அடிக்கடி பிரச்சினை ஏற்படும் என்பதும், இதன்காரணமாக அவர்களுக்கு இடையே முன் விரோதம் இருந்து வந்ததும் தெரிய வந்தது.

முன்விரோதத்தில் நடந்த கொலையா?

முன்விரோதம் காரணமாக தினகரனை அவரது நண்பர்களே தீர்த்துக்கட்டினரா? அல்லது வேறு ஏதேனும் காரணமா? என்று போலீசார் தொடர்ந்து விசாரணை நடத்தி வருகின்றனர். இதுகுறித்து போலீசார் வழக்குப்பதிவு செய்து இந்த கொலை சம்பவத்தில் ஈடுபட்ட மர்ம நபர்களை வலைவீசி தேடி வருகின்றனர்.