மோட்டார் சைக்கிள் மீது சரக்கு வேன் மோதல்; மெக்கானிக் பலி

அன்னவாசல்:

இலுப்பூர் அருகே விளாப்பட்டியை சேர்ந்தவர் சுப்பிரமணி (வயது 37). இவர் இலுப்பூரில் மெக்கானிக் கடை நடத்தி வந்தார். இந்தநிலையில் நேற்று இரவு மோட்டார் சைக்கிளில் இடையப்பட்டியில் நடைபெற்ற கோவில் திருவிழா கலை நிகழ்ச்சியை பார்ப்பதற்கு சென்றுள்ளார். பின்னர் மீண்டும் சொந்த ஊருக்கு திரும்பியுள்ளார். இடையப்பட்டி தண்ணீர் தொட்டி என்னும் இடத்தின் அருகே வந்த போது எதிரே வந்த சரக்கு வேன் சுப்பிரமணி ஓட்டி வந்த மோட்டார் சைக்கிள் மீது மோதியதாக கூறப்படுகிறது. இதில் தூக்கி வீசப்பட்டதில் படுகாயமடைந்த அவரை போலீசார் மீட்டு இலுப்பூர் அரசு மருத்துவமனைக்கு அனுப்பி வைத்தனர். அங்கு அவரை பரிசோதனை செய்த மருத்துவர்கள் அவர் இறந்து விட்டதாக தெரிவித்தனர். இதுகுறித்து இலுப்பூர் போலீசார் சரக்கு வேன் டிரைவர் இலுப்பூர் வெள்ளையான்குடியை சேர்ந்த சின்ராஜ் என்பவர் மீது வழக்குப்பதிவு செய்து விசாரணை நடத்தி வருகின்றனர்.