மோட்டார் சைக்கிள் மீது சரக்கு வேன் மோதல்; வாலிபர் பலி

அறந்தாங்கி அருகே பாலைவனம் ஆண்டவராயர் சமுத்திரத்தை சேர்ந்தவர் ராஜகோபால் மகன் சிங்காரவேலு (வயது 37). இவர் ஆலங்குடி அருகே அரசடிபட்டியில் உள்ள உறவினர் வீட்டின் காதணி விழாவிற்கு மோட்டார் சைக்கிளில் சென்று கொண்டிருந்தார். ஆலங்குடி மணிப்பள்ளம் அருேக வந்த போது, கே.வி. கோட்டையை சேர்ந்த அருண்குமார் என்பவர் ஓட்டி வந்த சரக்கு வேன் எதிர்பாராதவிதமாக மோட்டார் சைக்கிள் மீது மோதியது. இதில் சிங்காரவேலு படுகாயமடைந்து சம்பவ இடத்திலேயே பரிதாபமாக இறந்தார். இதற்கிடையே அப்பகுதியில் சரக்கு வேனை நிறுத்திவிட்டு அங்கிருந்து அருண்குமார் தப்பி சென்று விட்டார். இதுகுறித்து தகவல் அறிந்த ஆலங்குடி போலீஸ் இன்ஸ்பெக்டர் அழகம்மை மற்றும் போலீசார் சம்பவ இடத்திற்கு விரைந்து வந்து சிங்காரவேலு உடலை கைப்பற்றி பிரேத பரிசோதனைக்காக புதுக்கோட்டை அரசு மருத்துவக்கல்லூரி மருத்துவமனைக்கு அனுப்பி வைத்தனர். இதுகுறித்து சிங்காரவேலு மனைவி சுகன்யா கொடுத்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.