தர்மபுரி அருகே அரசு பஸ் டிரைவரை தாக்கிய விவசாயி மீது வழக்கு

தர்மபுரி:

தர்மபுரி நாயக்கன்கொட்டாய் பகுதியை சேர்ந்தவர் மணிகண்டன் (வயது 45). அரசு பஸ் டிரைவர். இவர் தர்மபுரியில் இருந்து வேப்பரம்பட்டி செல்லும் டவுன் பஸ்சை ஓட்டி சென்றார். இந்த பஸ் குரும்பட்டி அருகே சென்றபோது குப்பூரை சேர்ந்த விவசாயி மாதையன் தனது மனைவி மற்றும் மகளுடன் மோட்டார் சைக்கிளில் எதிரே வந்தார். அப்போது அந்த மோட்டார் சைக்கிள் எதிர்பாராதவிதமாக சாலை ஓரத்தில் சரிந்தது. இதனால் ஆத்திரமடைந்த மாதையன் டவுன் பஸ்ஸில் ஏறி மணிகண்டனை தாக்கி கொலை மிரட்டல் விடுத்தார். இதில் காயமடைந்த மணிகண்டன் தர்மபுரி அரசு ஆஸ்பத்திரியில் சிகிச்சை பெற்றார். இது தொடர்பாக அவர் கொடுத்த புகாரின் பேரில் தர்மபுரி டவுன் போலீசார் மாதையன் மீது வழக்குப்பதிவு செய்து விசாரணை நடத்தி வருகிறார்கள்.