மேல்விஷாரம் நகரசபை கூட்டம்

மேல்விஷாரம் நகரசபை கூட்டம் கூட்ட அரங்கில் நடைபெற்றது. நகரசபை தலைவர் எஸ்.டி.முகமதுஅமீன் தலைமை தாங்கினார். துணைத்தலைவர் குல்ஜார் அஹமது, ஆணையாளர் பிரீத்தி, பொறியாளர் பாபு ஆகியோர் முன்னிலை வகித்தனர்.

கூட்டத்தில் நடந்த விவாதம் வருமாறு:-

ஜபர்:- மேல்நிலை நீர்த்தேக்க தொட்டி பாழடைந்துள்ளது. அதனை சீர்செய்ய வேண்டும். நகரசபை கூட்ட அரங்கை புதுப்பிக்க வேண்டும்.

ஆணையாளர்:- செலவினம் குறித்து அறிக்கை அனுப்பியுள்ளோம் நிதி வந்தவுடன் சீர் செய்யப்படும்.

ஜியாவுதீன்:- தெருவிளக்குகள் எரிவதில்லை.

தலைவர்:- எல்.இ.டி.லைட் அமைக்க உள்ளோம். நிதி வந்தவுடன் உடனடியாக செய்யப்படும்.

ஹாஜிரா தபசும்:- கழிவுநீர் கால்வாய் பழுதடைந்து உள்ளது.

தலைவர்:- நடவடிக்கை எடுக்கப்படும்.

உஷா:- என்னுடைய வார்டில் தெரு விளக்குகள் சரியாக எரிவதில்லை.

தலைவர்:- ஏற்கனவே இருந்த நகராட்சியில் தெருவிளக்கு சம்பந்தமான அலுவலகம் செயல்படுகிறது. அதனை புதிதாக கட்டப்பட்ட நகராட்சி அலுவலகத்திற்கு கொண்டு வரப்பட்டு, அவர்களுக்கு என தனி அறை ஒதுக்கப்படும். பின்னர் தனியாக பதிவேடு வைத்து பராமரிக்கப்படும்.

ஜெயந்தி:- என்னுடைய வார்டில் சிமெண்டு சாலை மற்றும் கழிவுநீர் கால்வாய் அமைத்து தர வேண்டும். குப்பைகளை சரியாக அகற்றுவதில்லை..

தலைவர்:- சரியாக வேலை செய்யாத நகராட்சி பணியாளர்கள் மீது நடவடிக்கை எடுக்கப்படும்.

ஜமுனாராணி:- என்னுடைய வார்டில் சமுதாயக்கூடம் பழுதடைந்துள்ளது.

தலைவர்:- இதுகுறித்து அறிக்கை அனுப்பப்பட்டுள்ளது. நிதி வந்தவுடன் கட்டித் தரப்படும்.

இவ்வாறு விவாதம் நடைபெற்றது.

கூட்டத்தில் நகரமன்ற உறுப்பினர்கள், நகராட்சி அதிகாரிகள் உள்பட பலர் கலந்து கொண்டனர்.