சென்னை ஐகோர்ட்டு புதிதாக நியமிக்கப்பட்டுள்ள கூடுதல் நீதிபதி லட்சுமி நாராயணன் வரும் 27-ந் தேதி பதவியேற்பு

சென்னை,

கடந்த 17ஆம் தேதி நடைபெற்ற சுப்ரீம் கோர்ட்டு கொலிஜியம் கூட்டத்தில் சென்னை ஐகோர்ட்டு நீதிபதிகளாக 8 பேரை நியமனம் செய்ய பரிந்துரை செய்யப்பட்டது. இதில், பெரியசாமி வடமலை, ராமச்சந்திரன் கலைமதி, கோவிந்தராஜன் திலகவதி ஆகிய 3 மாவட்ட நீதிபதிகளையும், வெங்கடாச்சாரி லக்ஷ்மி நாராயணன், லக்ஷமண சந்திர விக்டோரியா கவுரி, பாலாஜி, ராமசாமி நீலகண்டன், கந்தசாமி குழந்தைவேலு, ராமகிருஷ்ணன் ஆகிய 5 வழக்கறிஞர்களையும் சென்னை உயர் நீதிமன்ற நீதிபதிகளாக நியமிக்க பரிந்துரை செய்யப்பட்டது.

வழக்கறிஞர்களான விக்டோரியா கவுரி, பாலாஜி, ராமகிருஷ்ணன், மாவட்ட நீதிபதிகளான கலைமதி, திலகவதி ஆகியோர் சென்னை உயர் நீதிமன்ற கூடுதல் நீதிபதிகளாக நியமிக்கப்பட்டதையடுத்து பிப்ரவரி 7ஆம் தேதி பதவியேற்றுக் கொண்டனர்.

இந்த நிலையில், வழக்கறிஞர் வெங்கடாச்சாரி லக்ஷ்மி நாராயணனை சென்னை ஐகோர்ட்டு கூடுதல் நீதிபதியாக நியமித்து ஜனாதிபதி திரவுபதி முர்மு நேற்று உத்தரவிட்டார். இதன்மூலம் சென்னை ஐகோர்ட்டின் நீதிபதிகள் எண்ணிக்கை 58ஆக உயர்ந்துள்ளது.

இந்நிலையில், சென்னை ஐகோர்ட்டு புதிதாக நியமிக்கப்பட்டுள்ள கூடுதல் நீதிபதி வெங்கடாச்சாரி லட்சுமி நாராயணன் வரும் 27-ந் தேதி (திங்கட்கிழமை) பதவியேற்க உள்ளார். இவருக்கு பொறுப்பு தலைமை நீதிபதி ராஜா, பதவிப்பிரமாணம் செய்து வைக்கிறார்.