பாளையம் சமத்துவபுரத்தில் ரூ.48¼ லட்சத்தில், 100 வீடுகள் பழுதுபார்க்கும் பணி-கலெக்டர் சாந்தி நேரில் ஆய்வு

தர்மபுரி மாவட்டம் நல்லம்பள்ளி ஊராட்சி ஒன்றியம் பாளையம்புதூர் ஊராட்சி பாளையம் சமத்துவபுரத்தில் உள்ள 100 வீடுகள் பழுது பார்க்கும் பணி நடைபெற்று வருகிறது.. இதில் உள்ள 89 வீடுகள் தலா ரூ.50 ஆயிரம் வீதம் ரூ.44½ லட்சம் மதிப்பீட்டிலும், 11 வீடுகள் தலா ரூ.35 ஆயிரம் வீதம் ரூ.3 லட்சத்து 85 ஆயிரம் மதிப்பீட்டிலும் என மொத்தம் 100 வீடுகள் ரூ.48.35 லட்சம் மதிப்பீட்டில் பராமரிப்பு மற்றும் பழுது பார்க்கும் பணிகள் நடைபெற்று வருகின்றன.

இந்த பணிகளை கலெக்டர் சாந்தி நேரில் பார்வையிட்டு ஆய்வு செய்தார். பராமரிப்பு மற்றும் பழுது பார்க்கும் பணிகள் உள்ளிட்ட அனைத்து பணிகளையும் விரைந்து முடித்திட வேண்டுமென அலுவலர்களுக்கு அவர் உத்தரவிட்டார். இந்த பராமரிப்பு பணிகளை விரைந்து முடித்து பயன்பாட்டிற்கு கொண்டு வர வேண்டும் என்று அதிகாரிகளுக்கு அவர் உத்தரவிட்டார்.

இந்த ஆய்வின் போது மாவட்ட ஊரக வளர்ச்சி முகமை உதவி திட்ட அலுவலர் உஷாராணி, பசுமை வீடுகள் வட்டார வளர்ச்சி அலுவலர் தண்டபாணி, நல்லம்பள்ளி ஊராட்சி ஒன்றிய வட்டார வளர்ச்சி அலுவலர்கள் சகிலா, கவுரி, உதவிப்பொறியாளர் கிருஷ்ணமூர்த்தி, ஒன்றிய பணி மேற்பார்வையாளர் சேத்தாஜ், பாளையம்புதூர் ஊராட்சி மன்ற தலைவர் சுப்பிரமணியம், பாளையம் சமத்துவபுர குடியிருப்போர் நல சங்கத்தலைவர் சேகர் ஆகியோர் உடன் இருந்தனர்.