மின்சாரம் தாக்கி கல்லூரி மாணவர் பலி

கடையம்:

கடையம் அருகே மின்சாரம் தாக்கி கல்லூரி மாணவர் பரிதாபமாக இறந்தார்.

கல்லூரி மாணவர்

தென்காசி மாவட்டம் கடையம் அருகே உள்ள கோவிந்தபேரி நடுத்தெருவை சேர்ந்தவர் சுப்பிரமணியன். இவர் கேரளாவில் வேலை பார்த்து வருகிறார். அவருடைய மகன் முத்துக்குமார் (வயது 18).

இவர் நெல்லை மாவட்டம் அம்பையில் உள்ள கல்லூரியில் பி.ஏ. ஆங்கிலம் இரண்டாம் ஆண்டு படித்து வந்தார்.

இந்த நிலையில் நேற்று முன்தினம் இரவு தேவர் ஜெயந்தி விழாவிற்கு கொடியேற்றுவதற்காக நண்பர்களுடன் சேர்ந்து இரும்பு பைப்பில் ஆன கம்பத்தை நட்டும் பணியில் ஈடுபட்டார்.

மின்சாரம் தாக்கி பலி

அப்போது கம்பத்தின் மேலே சென்ற மின்சார கம்பியின் மீது எதிர்பாராதவிதமாக பட்டதில் முத்துக்குமாரை மின்சாரம் தாக்கியது. இதில் சம்பவ இடத்திலேயே அவர் துடிதுடித்து பரிதாபமாக இறந்தார்.

தகவல் அறிந்ததும் ஆழ்வார்குறிச்சி போலீசார் விரைந்து வந்தனர். முத்துக்குமார் உடலை கைப்பற்றி பிரேத பரிசோதனைக்காக தென்காசி அரசு ஆஸ்பத்திரிக்கு அனுப்பி வைத்தனர். மேலும் இச்சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.