விளாத்திகுளத்தில் சமுதாய வளைகாப்பு விழா

எட்டயபுரம்:

விளாத்திகுளத்தில் உள்ள தனியார் திருமண மண்டபத்தில் சமூக நலன் மற்றும் மகளிர் உரிமைத்துறை ஒருங்கிணைந்த குழந்தை வளர்ச்சிப் பணிகள் திட்டம் சார்பில் சமுதாய வளைகாப்பு விழா நடந்தது. விழாவிற்கு மாவட்ட திட்ட அலுவலர் சரஸ்வதி தலைமை தாங்கினார். குழந்தை வளர்ச்சி திட்ட அலுவலர் தாஜீன்னிசா, விளாத்திகுளம் பேரூராட்சி மன்ற தலைவர் அய்யன் ராஜ் ஆகியோர் முன்னிலை வகித்தனர். சிறப்பு அழைப்பாளராக ஜி.வி.மார்க்கண்டேயன் எம்.எல்.ஏ. கலந்து கொண்டு 200 கர்ப்பிணி பெண்களுக்கு சேலை, தேங்காய், மஞ்சள் கயிறு, பூ, வளையல் அடங்கிய வளைகாப்பு சீர் வழங்கினார். பின்னர் கர்ப்பிணி பெண்களுக்கு வளையல் போட்டு விழா நடைபெற்றது. மேலும் மகளிர் சுய உதவிக் குழுவினர் கர்ப்பிணி பெண்களை வாழ்த்தி தாலாட்டு பாடினர். நிகழ்ச்சியில் தி.மு.க கிழக்கு ஒன்றிய செயலாளர் சின்ன மாரிமுத்து, விளாத்திகுளம் தி.மு.க நகர செயலாளர் வேலுச்சாமி, வட்டார வளர்ச்சி அலுவலர்கள் முத்துக்குமார், தங்கவேல் மற்றும் அதிகாரிகள் உள்பட பலர் கலந்து கொண்டனர்.

இதேபோன்று புதூரில் நடைபெற்ற வளைகாப்பு விழாவில் 150 கர்ப்பிணி பெண்கள் கலந்து கொண்டனர்.