இருதரப்பினர் இடையே மோதல்; 10 பேர் படுகாயம்

ஒரத்தநாடு

ஒரத்தநாடு அருகே இரு தரப்பினர் இடையே ஏற்பட்ட மோதலில் 10 பேர் படுகாயமடைந்தனர். இதுதொடர்பாக 21 பேர் மீது போலீசார் வழக்குப்பதிவு செய்துள்ளனர்.

இருதரப்பினர் இடையே மோதல்

தஞ்சை மாவட்டம் ஒரத்தநாட்டை அடுத்துள்ள சில்லத்தூர் தெற்கு தெருவில் இரு தரப்பினரிடையே முன்விரோதம் இருந்து வருகிறது. இந்தநிலையில் அதே ஊரில் சில தினங்களுக்கு முன்பு ஒரு கோவிலின் குடமுழுக்கு விழாவிற்கு ஒரு தரப்பினர் முளைப்பாரி எடுத்துக்கொண்டு ஊர்வலமாக சென்றனர். அப்போது இருதரப்பினரிடையே மீண்டும் மோதல் வெடித்தது.

அப்போது கம்பு, கற்கள் உள்ளிட்ட ஆயுதங்களால் ஒருவரை ஒருவர் தாக்கி கொண்டனர். இதில் இருதரப்பையும் சேர்ந்த 10-க்கும் மேற்பட்டோர் படுகாயமடைந்தனர். இவர்கள் அனைவரும் பட்டுக்கோட்டை அரசு ஆஸ்பத்திரி மற்றும் ஒரத்தநாடு அரசு ஆஸ்பத்திரிகளில் சிகிச்சை பெற்று வருகின்றனர்.

21 பேர் மீது வழக்கு

இதுகுறித்து அபினேஷ் (வயது20) என்பவர் கொடுத்த புகாரின் பேரில் 14 பேர் மீதும், செல்வமூர்த்தி (20) கொடுத்த புகாரின் பேரில் 7 பேர் மீதும் ஆக இருதரப்பையும் சேர்ந்த 21 பேர் மீது ஒரத்தநாடு போலீசார் வழக்குப்பதிவு செய்து விசாரணை நடத்தி வருகின்றனர்.