பள்ளத்தில் மோட்டார் சைக்கிள் கவிழ்ந்து கட்டிட தொழிலாளி பலி

வேப்பந்தட்டை:

பெரம்பலூர் மாவட்டம் வேப்பந்தட்டையை அடுத்துள்ள தொண்டமாந்துறை கிராமத்தை சேர்ந்தவர் அழகேசன்(வயது 45). கட்டிட தொழிலாளியான இவர் நேற்று பூஞ்சோலை கிராமத்தில் வேலை செய்துவிட்டு பின்னர் மோட்டார் சைக்கிளில் தொண்டமாந்துறை நோக்கி வந்து கொண்டிருந்தார். முருகன் கோவில் அருகே வந்தபோது எதிர்பாராதவிதமாக சாலையோர பள்ளத்தில் மோட்டார் சைக்கிள் கவிழ்ந்தது. இதில் அவர் சம்பவ இடத்திலேயே பரிதாபமாக உயிரிழந்தார். இது பற்றி தகவல் அறிந்து சம்பவ இடத்திற்கு விரைந்து வந்த அரும்பாவூர் போலீசார், அழகேசனின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.