குன்னூர் ரைசிங் ஸ்டார்ஸ் அணி வெற்றி

கோத்தகிரி,

நீலகிரி மாவட்ட கிரிக்கெட் சங்கம் சார்பில், மாவட்ட அளவிலான ஏ, பி மற்றும் சி டிவிஷன் கிரிக்கெட் போட்டிகள் கோத்தகிரி காந்தி மைதானத்தில் நடைபெற்று வருகிறது. இந்தநிலையில் நேற்று நடைபெற்ற ஏ டிவிஷன் பிரிவிற்கான லீக் போட்டியில் ஊட்டி எச்.பி.எப். அணியும், குன்னூர் ரைசிங் ஸ்டார்ஸ் அணியும் மோதியது. போட்டியில் டாஸ் வென்று முதலில் பேட்டிங் செய்த எச்.பி.எப். அணி நிர்ணயிக்கப்பட்ட 35 ஓவர்களில், 26.4 ஓவர்களில் அனைத்து விக்கெட்டுகளையும் இழந்து 147 ரன்கள் எடுத்தது. இந்த அணி வீரர் மணிமந்தேன் 27 ரன்கள் எடுத்தார். ரைசிங் ஸ்டார்ஸ் அணியின் பந்து வீச்சாளர் புனித் 3 விக்கெட்டுகளை வீழ்த்தினார். தொடர்ந்து 210 பந்துகளில் 148 ரன்கள் எடுத்தால் வெற்றி என்ற இலக்குடன் விளையாடிய ரைசிங் ஸ்டார்ஸ் அணி 15 ஓவர்களில் 5 விக்கெட்டுகளை மட்டும் இழந்து வெற்றி பெற்றது. இந்த அணி வீரர் ஜிபின் 81 ரன்கள் எடுத்தார். இதன் மூலம் ரைசிங் ஸ்டார்ஸ் அணி 5 விக்கெட் வித்தியாசத்தில் வெற்றி பெற்றது.