பெரம்பலூரில் ஒரேநாளில் 20,376 பேருக்கு கொரோனா தடுப்பூசி

தமிழகத்தில் மீண்டும் பரவி வரும் கொரோனா வைரசை தடுக்க அரசின் உத்தரவின்படி பொது சுகாதாரம் மற்றும் நோய் தடுப்பு மருந்து துறை கொரோனா தடுப்பூசி செலுத்தி கொள்வதற்கான 31-வது சிறப்பு முகாம்களை நேற்று நடத்தியது. முகாம்களில் இதுவரை கொரோனா தடுப்பூசி செலுத்தி கொள்ளாதவர்களும், 2-ம் தவணை தடுப்பூசி செலுத்தி கொள்ளாதவர்களும், முன்னெச்சரிக்கை (பூஸ்டர்) தவணை தடுப்பூசி செலுத்தி கொள்ளாதவர்களும் ஆர்வத்துடன் வந்து தடுப்பூசி செலுத்தி கொண்டனர்.

பெரம்பலூர் மாவட்டத்தில் நேற்று 4 அரசு மருத்துவமனைகள், 29 ஆரம்ப சுகாதார நிலையங்கள் உள்பட மொத்தம் 400 இடங்களில் நடந்த சிறப்பு முகாம்கள் மூலம் 25 ஆயிரம் பேருக்கு தடுப்பூசி செலுத்தப்படுவதாக இலக்கு நிர்ணயிக்கப்பட்டு, 20 ஆயிரத்து 376 பேருக்கு தடுப்பூசி செலுத்தப்பட்டது.