மோட்டார் சைக்கிள் மீது கார் மோதியதில் தம்பதி பலி

கார் மோதல்

கோவை கணபதி அருகே உள்ள கிருஷ்ணராயபுரம் டி.பி.சி. காலனியை சேர்ந்தவர் ஜெபமாலைராஜ் (வயது 62). இவர் நேற்று மதியம் தனது காரில் திண்டுக்கல்லில் இருந்து கரூர் நோக்கி தேசிய நெடுஞ்சாலையில் சென்று கொண்டிருந்தார்.

அரவக்குறிச்சி மேட்டுப்பட்டி பிரிவு சாலை அருகே சென்று கொண்டிருந்தபோது, எதிரே அரவக்குறிச்சி அருகே புதுவாடி கிராமத்தை சேர்ந்த ராஜு (50), அவரது மனைவி தனக்கொடி (45) ஆகிய 2 பேரும் ஒரு மோட்டார் சைக்கிளில் வந்து கொண்டிருந்தனர். அப்போது எதிர்பாராத விதமாக மோட்டார் சைக்கிள் மீது கார் மோதி பள்ளத்தில் கவிழ்ந்தது.

தம்பதி பலி

இதில் மோட்டார் சைக்கிளில் இருந்து தூக்கி வீசப்பட்ட ராஜு மற்றும் தனக்கொடி ஆகியோர் சம்பவ இடத்திலேயே பரிதாபமாக இறந்தனர். மேலும் காரின் இடிபாடுகளில் சிக்கிய ஜெபமாலைராஜ் பலத்த காயம் அடைந்து, அவரது இடது கையில் எலும்பு முறிவு ஏற்பட்டது. இதைக்கண்ட அப்பகுதி பொதுமக்கள் அரவக்குறிச்சி போலீசாருக்கு தகவல் தெரிவித்தனர்.

அதன்பேரில் போலீசார் சம்பவ இடத்திற்கு வந்து, இடிபாடுகளில் சிக்கிய ஜெபமாலைராஜை மீட்டு சிகிச்சைக்காக கரூரில் உள்ள ஒரு தனியார் மருத்துவமனைக்கு அனுப்பி வைத்தனர். பின்னர் ராஜு மற்றும் தனக்கொடி உடல்களை கைப்பற்றி பிரேத பரிசோதனைக்காக அரவக்குறிச்சி அரசு மருத்துவமனைக்கு அனுப்பி வைத்தனர். இந்த விபத்து குறித்து அரவக்குறிச்சி போலீசார் வழக்குப்பதிந்து விசாரணை நடத்தி வருகின்றனர்.