மரத்தில் கார் மோதி தம்பதி பலி

பொன்னமராவதி:

உறவினர் வீட்டு திருமணம்

புதுக்கோட்டை ராஜகோபாலபுரம் அருகே பூங்கா நகரை சேர்ந்தவர் சிதம்பரம் (வயது 65). இவரது மனைவி அலமேலு (60). இவர்கள் இருவரும் பொன்னமராவதி அருகே உள்ள வேந்தன்பட்டியில் நடைபெற்ற உறவினர் வீட்டு திருமண விழாவில் கலந்து கொண்டு புதுக்கோட்டைக்கு காரில் திரும்பி வந்து கொண்டிருந்தனர்.

காரை சிதம்பரம் ஓட்டினார். பொன்னமராவதி அருகே செம்பூதி சாலையில் வந்த போது திடீரென கார் கட்டுப்பாட்டை இழந்து சாலையோரத்தில் இருந்த புளிய மரத்தில் மோதியது.

கணவன்-மனைவி பலி

இதில் படுகாயமடைந்த சிதம்பரம் சம்பவ இடத்திலேயே பரிதாபமாக உயிரிழந்தார். அலமேலு 2 கால்களும் துண்டிக்கப்பட்ட நிலையில் படுகாயமடைந்தார். இதுகுறித்து தகவல் அறிந்த பொன்னமராவதி தீயணைப்பு நிலைய அலுவலர் சந்தானம் தலைமையிலான வீரர்கள் சம்பவ இடத்திற்கு விரைந்து வந்து அக்கம் பக்கத்தினர் உதவியுடன் காரின் இடிபாடுகளில் சிக்கிக்கொண்டிருந்த அலமேலுவை மீட்டு சிகிச்சைக்காக வலையப்பட்டி பாப்பாயி ஆச்சி அரசு மருத்துவமனைக்கு அனுப்பி வைத்தனர். அங்கு அவர் சிகிச்சை பலனின்றி பரிதாபமாக இறந்தார்.

சோகம்

இதற்கிடையே பொன்னமராவதி போலீசார் சம்பவ இடத்திற்கு விரைந்து சென்று சிதம்பரம் உடலை கைப்பற்றி பிரேத பரிசோதனைக்காக வலையப்பட்டி பாப்பாயி ஆச்சி அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

உறவினர் வீட்டின் திருமணத்திற்கு சென்று விட்டு திரும்பிய போது விபத்தில் கணவன்-மனைவி பலியான சம்பவம் அப்பகுதியில் சோகத்தை ஏற்படுத்தியது.