தினத்தந்தி புகார் பெட்டி

ஆபத்தான மின்கம்பம்

புதுக்கோட்டை மாவட்டம், அறந்தாங்கி வட்டம், அரசர்குளம் தென்பாதி ஊராட்சிக்கு உட்பட்ட அண்ணா சாலை பகுதியில் ஏராளமான பொதுமக்கள் வசித்து வருகின்றனர். இப்பகுதியில் மின்கம்பங்கள் அமைக்கப்பட்டு அருகில் உள்ள வீடுகளுக்கு மின் வினியோகம் செய்யப்பட்டு வருகிறது. இந்த நிலையில் இந்த பகுதியில் அமைக்கப்பட்டுள்ள மின்கம்பம் ஒன்று சிதிலமடைந்து சிமெண்டு பூச்சுக்கள் உதிர்ந்து கம்பிகள் வெளியே தெரிகின்றன. மேலும் இந்த மின் கம்பம் சாலை ஓரத்தில் உள்ளதால் பொதுமக்கள் நடமாட்டத்தின்போது முறிந்து விழுந்தால் உயிரிழப்பு ஏற்பட அதிக வாய்ப்பு உள்ளது. எனவே இது குறித்து சம்பந்தப்பட்ட அதிகாரிகள் விரைந்து நடவடிக்கை எடுக்க வேண்டும் என கேட்டுக்கொள்கிறோம்.

பொதுமக்கள், அரசர்குளம், புதுக்கோட்டை.

எரியாத உயர்கோபுர மின் விளக்கு

புதுக்கோட்டை மாவட்டம், ஆதனக்கோட்டை மடத்துக்கடை பஸ் நிறுத்தத்தில் உள்ள உயர்மின் கோபுர விளக்கு கடந்த 6 மாதமாக எரியாமல் உள்ளது. இந்த இடம் கடைகள் மற்றும் வனிக நிறுவனங்கள் அதிகம் உள்ள பகுதி என்பதால் பொதுமக்கள் இரவு நேரங்களில் கடைவீதிக்கு அதிக அளவில் வந்து செல்கின்றனர். வெளியூர்களுக்கு வேலை நிமித்தமாக பஸ்களில் சென்று வரும் பெண்கள் இரவு நேரங்களில் அச்சத்துடனே செல்கின்றனர். பொதுமக்கள் மடந்துக்கடை சாலையினை கடக்கும்போது இரவு நேரங்களில் அதிக விபத்து ஏற்பட வாய்ப்புள்ளதால் உடனடியாக பழுதடைந்துள்ள உயர்மின் கோபுர விளக்கினை சீரமைத்து ஒளிரச் செய்ய சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம்.

பொதுமக்கள், ஆதனக்கோட்டை, புதுக்கோட்டை.