தினத்தந்தி புகார் பெட்டி

குறுகளான பாலத்தால் மக்கள் அவதி

கரூர் மாவட்டம், நொய்யல் அருகே உள்ள மரவாபாளையத்தில் புகழூர் வாய்க்காலின் குறுக்கே குறுகலான பாலம் கட்டப்பட்டுள்ளது. இந்த பாலத்தின் வழியாக விவசாயிகள், பொதுமக்கள் சென்று வருகின்றனர். இந்நிலையில் விவசாயிகள் இடு பொருட்களையும், விளைவுகளையும் இந்த பாலத்தின் வழியாக கொண்டு செல்ல முடியாமல் அவதிப்பட்டு வருகின்றனர். எனவே குறுகிய பாலத்தை அகலப்படுத்தி தர சம்பந்தப்பட்ட அதிகாரிகள் நடவடிக்கை எடுக்க வேண்டும் என கேட்டுக்கொள்கிறோம்.

குணசேகரன், மரவாபாளையம், கரூர்.

தெரு விளக்குகள் அமைக்கப்படுமா?

புதுக்கோட்டை மாவட்டம், அரிமளம் பேரூராட்சி காமராஜர்புரம் சாலையில் இருபுறமும் கருவேல மரங்கள் முளைத்து காடுபோல் காட்சி அளிக்கிறது. இந்த நிலையில் இந்த சாலையோரத்தில் மின் விளக்குகள் அமைக்கப்படாததால் இரவு நேரத்தில் சாலையில் பாம்பு உள்ளிட்ட விஷ ஜந்துக்களின் நடமாட்டம் அதிக அளவில் உள்ளது. இதனால் சாலையில் நடந்து செல்லும் பொதுமக்கள் மற்றும் இருசக்கர வாகன ஓட்டிகள் பெரிதும் அச்சத்துடனேயே சாலையில் சென்று வருகின்றனர். எனவே இதுகுறித்து சம்பந்தப்பட்ட அதிகாரிகள் விரைந்து நடவடிக்கை எடுத்து இப்பகுதியில் தெருவிளக்குகள் அமைக்க வேண்டும் என கேட்டுக்கொள்கிறோம்.

சந்தோஷ், அரிமளம், புதுக்கோட்டை.