அமராவதி அணைப்பகுதியில் அதிகாரிகள் தீவிர கண்காணிப்பு

மாண்டஸ் புயல் எச்சரிக்கை எதிரொலி காரணமாக அமராவதி அணைப்பகுதியில் அதிகாரிகள் தீவிர கண்காணிப்பு பணியில் ஈடுபட்டு வருகிறார்கள்.

அமராவதி அணை

உடுமலையை அடுத்த மேற்கு தொடர்ச்சி மலையில் உற்பத்தியாகின்ற நீராதாரங்களை கொண்டு அமராவதி அணை கட்டப்பட்டு உள்ளது. தமிழகம் மற்றும் கேரளா மாநில வனப்பகுதியில் உற்பத்தியாகின்ற சின்னாறு, தேனாறு, பாம்பாறு மற்றும் துணை ஆறுகள் மழைக்காலங்களில் அணைக்கு நீர்வரத்தை கொடுக்கிறது. அதை ஆதாரமாகக் கொண்டு திருப்பூர் மற்றும் கரூர் மாவட்டங்களில் 54 ஆயிரத்து 637 ஏக்கர் நிலங்கள் பாசன வசதி பெற்று வருகிறது.

அமராவதி பழைய ஆயக்கட்டு பாசனத்திற்கு அமராவதிஆறு மூலமாகவும், புதிய ஆயக்கட்டு பாசனத்திற்கு பிரதான கால்வாய் மூலமாகவும் தண்ணீர் திறந்து விடப்பட்டு வரப்படுகிறது. அத்துடன் அமராவதிஆறு மற்றும் பிரதான கால்வாயை அடிப்படையாகக் கொண்டு குடிநீர் திட்டங்களும் செயல்படுத்தப்பட்டு வருகிறது.

நீர்வரத்து அதிகரிப்பு

இந்த சூழலில் வடகிழக்கு பருவமழை தீவிரம் அடைந்ததை யொட்டி வனப்பகுதியில் உள்ள காந்தளூர், மூணார், மறையூர் உள்ளிட்ட அமராவதி அணையின் நீராதாரங்களில் சாரல் மழையும் அவ்வப்போது பலத்த மழை பெய்து வருகிறது. அந்த வகையில் கடந்த சில நாட்களாக பெய்த மழையின் காரணமாக ஆறுகளில் நீர்வரத்து ஏற்பட்டதால் அணைக்கு வந்து கொண்டுள்ள தண்ணீரின் அளவு அதிகரித்தது.

இதனால் அணையின் நீர்இருப்பும் கிடுகிடுவென உயர்ந்து ஒரு மாதத்திற்கு மேலாக முழு கொள்ளளவில் நீடித்து வருகிறது. மேலும் மாண்டஸ் புயல் உருவாகி உள்ளதை யொட்டி வானம் மேகமூட்டமாக காணப்படுகிறது. இதன் காரணமாக கனமழை பெய்வதற்கான சூழலும் நிலவுகிறது.

அதிகாரிகள் கண்காணிப்பு

இதையடுத்து அதிகாரிகள் அணைப்பகுதியில் முகாமிட்டு உள்ளத்துடன் அணைக்கு ஏற்பட்டுள்ள நீர்வரத்தை இரவு பகலாக தீவிரமாக கண்காணித்து வருகின்றனர். அணைக்கு நீர் வரத்து அதிகரித்தால் அமராவதி ஆற்றில் உபரிநீர் திறப்பதற்கு உண்டான சூழல் நிலவுவதால் கரையோர கிராமங்களில் பதற்றம் நிலவி வருகிறது.

நேற்று காலை 6 மணி நேர நிலவரப்படி 90 அடி உயரம் கொண்ட அமராவதி அணையில் 89.47 அடி உயரத்திற்கு தண்ணீர் உள்ளது. அணைக்கு வினாடிக்கு 501 கன அடி தண்ணீர் வந்து கொண்டு உள்ளது. அணையில் இருந்து வினாடிக்கு 488 கனஅடி தண்ணீர் வெளியேற்றப்படுகிறது.