ரெயில் மோதி வாலிபர் சாவு

கோவையில் இருந்து மும்பை செல்லும் குர்லா எக்ஸ்பிரஸ் ரெயில் நேற்று மதியம் தர்மபுரிக்கு வந்தது. தர்மபுரி ரெயில் நிலையத்தின் 2-வது பிளாட்பார பகுதியில் 30 வயது மதிக்கத்தக்க வாலிபர் தண்டவாளத்தை கடக்க முயன்றார். அப்போது அவர் ரெயில் மோதி சம்பவ இடத்திலேயே உயிரிழந்தார். இதுபற்றி தகவல் அறிந்த தர்மபுரி ரெயில்வே போலீசார் சம்பவ இடத்திற்கு விரைந்து சென்று இறந்தவரின் உடலை கைப்பற்றி பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். இறந்தவர் யார்? எந்த ஊரைச் சேர்ந்தவர்? என்ற விவரங்கள் உடனடியாக தெரிய வரவில்லை. இதுகுறித்து ரெயில்வே போலீசார் வழக்குப்பதிவு செய்து விசாரணை நடத்தி வருகிறார்கள்.