கார் மோதி விவசாயி பலி

குருபரப்பள்ளி:

குருபரப்பள்ளி அருகே கார் மோதி விவசாயி இறந்தார்.

விவசாயி

கிருஷ்ணகிரி தாலுகா பில்லனகுப்பம் கரிக்கல்நத்தம் பகுதியை சேர்ந்தவர் திருப்பதி (வயது 48). விவசாயி. இவருக்கு மனைவி மற்றும் குழந்தைகள் உள்ளனர். சம்பவத்தன்று இவர் கிருஷ்ணகிரி-பெங்களூரு தேசிய நெடுஞ்சாலையில் புலியரசி கிராமம் அருகில் நடந்து சென்று கொண்டு இருந்தார். அப்போது அந்த வழியாக சென்ற கார் அவர் மீது மோதியது. இந்த விபத்தில் திருப்பதி படுகாயம் அடைந்தார். அக்கம் பக்கத்தினர் அவரை மீட்டு சிகிச்சைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். ஆனால் ஆஸ்பத்திரிக்கு செல்லும் வழியிலேயே அவர் பரிதாபமாக இறந்தார்.

விசாரணை

இந்த விபத்து குறித்து குருபரப்பள்ளி போலீசாருக்கு தகவல் தெரிவிக்கப்பட்டது. அதன்பேரில் போலீசார் விரைந்து சென்று திருப்பதியின் உடலை கைப்பற்றி பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விபத்தை ஏற்படுத்திய கார் குறித்து விசாரணை நடத்தி வருகிறார்கள்.