மோட்டார்சைக்கிளில் இருந்து விழுந்து பெண் சாவு

கிருஷ்ணகிரியில் மோட்டார்சைக்கிளில் இருந்து விழுந்து பெண் பரிதாபமாக இறந்தார். இவரது உறவினர் படுகாயம் அடைந்தார்.

கீழே விழுந்தனர்

கிருஷ்ணகிரி பெத்தனப்பள்ளி பக்கமுள்ள சின்னமாட்டன்கொட்டாயை சேர்ந்தவர் வளர்மதி (வயது 37). இவர் தனது உறவினர் மாது (29) என்பவருடன் மோட்டார்சைக்கிளில் கிருஷ்ணகிரியில் தமிழ்நாடு ஓட்டல் அருகில் சென்று கொண்டிருந்தார். அப்போது அவர்கள் 2 பேரும் மோட்டார் சைக்கிளில் இருந்து நிலைதடுமாறி கீழே விழுந்தனர்.

இந்த விபத்தில் அவர்கள் 2 பேரும் படுகாயம் அடைந்தனர். இதையடுத்து அவர்களை அங்கிருந்தவர்கள் மீட்டு சிகிச்சைக்காக ஆம்புலன்ஸ் மூலம் கிருஷ்ணகிரி அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வந்தது.

பெண் சாவு

இந்த நிலையில் சிகிச்சை பலனின்றி வளர்மதி பரிதாபமாக இறந்தார். மாதுவிற்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து தகவல் அறிந்ததும் கிருஷ்ணகிரி டவுன் போலீசார் ஆஸ்பத்திரிக்கு சென்று வளர்மதியின் உடலை கைப்பற்றி பிரேத பரிசோதனைக்காக அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.