பிரேத பரிசோதனை செய்வதில் தாமதம்: குளித்தலை அரசு மருத்துவமனை முன்பு உறவினர்கள் சாலை மறியல்

பனியன் கம்பெனி

கரூர் மாவட்டம் கிருஷ்ணராயபுரம் ஊராட்சி ஒன்றியத்துக்குட்பட்ட கல்லுப்பட்டி பகுதியை சேர்ந்தவர் குமார் (வயது 29). இவருக்கு திருமணமாகி ஒரு மகள் உள்ளார். குமார் ஈரோடு பகுதியில் உள்ள தனியார் பனியன் கம்பெனியில் வேலை செய்து வந்துள்ளார். இவரது உறவினரான குன்னம்பட்டியை சேர்ந்த சிவா என்பவரின் தாத்தா கடந்த சில நாட்களுக்கு முன்பு இறந்துள்ளார்.

இதற்காக குமார் ஈரோட்டில் இருந்து தனது ஊருக்கு வந்துள்ளார். அப்போது குமாரின் உறவினரான ஜெகதாபி பகுதியை சேர்ந்த மணிகண்டன் என்பவர் சிவாவை பார்க்க வேண்டும் எனக்கூறி கடந்த 16-ந் தேதி குமாரை தன்னுடன் மோட்டார் சைக்கிளில் அழைத்து சென்றுள்ளார்.

விபத்தில் காயம்

மாயனூர் அருகே உள்ள மதுக்கரை கரட்டு பாலம் அருகே சென்று கொண்டிருந்தபோது மதுபோதையில் இருந்த அவர்கள் மோட்டார் சைக்கிளில் இருந்து கீழே விழுந்ததாக கூறப்படுகிறது. அதில் குமாருக்கு காயம் ஏற்பட்டுள்ளது. இதையடுத்து, மணிகண்டன், குமாரை அங்கேயே அமர வைத்துவிட்டு மனவாசி பகுதியில் இருந்த சிவாவை தன்னுடன் அழைத்து சென்றுள்ளார்.

பின்னர் காயம் அடைந்த குமாரை அதே மோட்டார் சைக்கிளில் ஏற்றிக்கொண்டு கரையாம்பட்டியில் உள்ள குமாரின் உறவினர் வீட்டின் முன்பு அவரை போட்டுவிட்டு சிவாவும் மணிகண்டனும் அங்கிருந்து தப்பி சென்று விட்டதாக கூறப்படுகிறது.

பிரேத பரிசோதனை

இந்தநிலையில் நேற்று முன்தினம் குமாரின் மாமியார் பாக்கியம் அந்த வழியாக சென்றபோது குமார் காயம் அடைந்து கிடப்பதை கண்டு அதிர்ச்சியடைந்து சத்தம் போடவே அங்கு வந்த அவர்களது உறவினர்கள் குமாரை மீட்டு கரூரில் உள்ள தனியார் மருத்துவமனைக்கு கொண்டு சென்றுள்ளனர். அங்கு குமாரை பரிசோதித்த டாக்டர்கள் அவர் ஏற்கனவே இறந்து விட்டதாக தெரிவித்துள்ளனர்.

இதையடுத்து தோகைமலை போலீசாரின் அறிவுறுத்தலின் பேரில் குமாரின் உடலை பிரேத பரிசோதனை செய்வதற்காக குளித்தலை அரசு மருத்துவமனைக்கு அவரது உறவினர்கள் நேற்று முன்தினம் கொண்டு சென்றுள்ளனர். ஆனால் நேற்று பிற்பகல் வரை குமாரின் உடல் பிரேத பரிசோதனை செய்யப்படவில்லை. அதுபோல் மணிகண்டன், சிவா ஆகிய 2 பேரும் அரசு மருத்துவமனைக்கு வராமல் இருந்துள்ளனர்.

சாலை மறியல்

இதனால் சந்தேகமடைந்த குமாரின் உறவினர்கள் குளித்தலை அரசு மருத்துவமனை முன்பு நேற்று திடீர் சாலை மறியலில் ஈடுபட்டனர். இதுகுறித்து தகவல் அறிந்து சம்பவ இடத்துக்கு வந்த போலீசார் அவர்களை சமாதானப்படுத்தி அரசு மருத்துவமனை வளாகத்துக்குள் அழைத்து சென்றனர். இதனைத் தொடர்ந்து அங்கு வந்த குளித்தலை போலீஸ் துணை சூப்பிரண்டு ஸ்ரீதர், குமாரின் பெற்றோர் மற்றும் உறவினர்களிடம் விசாரணை செய்தார். அப்போது தனது மகனின் இறப்பில் சந்தேகம் இருப்பதாகவும் இது தொடர்பாக சிவா மற்றும் மணிகண்டன் ஆகிய 2 பேரையும் போலீசார் விசாரணை செய்து உரிய நடவடிக்கை எடுக்க வேண்டும் என மனு அளித்தனர்.

அதனை பெற்றுக் கொண்ட போலீஸ் துணை சூப்பிரண்டு ஸ்ரீதர் இந்த சம்பவம் குறித்து உரிய முறையில் விசாரணை நடத்தி நடவடிக்கை எடுப்பதாக தெரிவித்தார். அதனை ஏற்று குமாரின் உறவினர்கள் சமாதானம் அடைந்தனர்.

உறவினர்களிடம் ஒப்படைப்பு

இதனைத்தொடர்ந்து குமாரின் உடல் பிரேத பரிசோதனை செய்யப்பட்டு அவரது உறவினர்களிடம் ஒப்படைக்கப்பட்டது. குளித்தலை அரசு மருத்துவமனை முன்பு நடந்த சாலை மறியலால் அப்பகுதியில் சிறிது நேரம் போக்குவரத்து பாதிக்கப்பட்டது. மேலும் இந்த சம்பவம் அப்பகுதியில் பரபரப்பை ஏற்படுத்தியது.