சக்தி மாரியம்மன் கோவிலில் தீமிதி திருவிழா

சேத்தியாத்தோப்பு

சிதம்பரம் தாலுகா அள்ளூர் கிராமத்தில் ஸ்ரீ மகா சக்தி மாரியம்மன், ஸ்ரீ செல்லியம்மன் கோவிலில் 22-வது ஆண்டு தீமிதி திருவிழா நடைபெற்றது. இதனை முன்னிட்டு கடந்த 14-ந் தேதி அம்மனுக்கு கொடியேற்றி காப்பு கட்டுதல் நிகழ்ச்சி நடைபெற்றது. அதனை தொடர்ந்து தினந்தோறும் சிறப்பு அபிஷேக ஆராதனை நடந்தது.

நேற்று முன்தினம் காலை கழு மரம் ஏறுதல் நிகழ்ச்சி நடந்தது. பின்னர் மாலை 6 மணிக்கு தீமிதி திருவிழா நடைபெற்றது. இதில் 100-க்கும் மேற்பட்ட பக்தர்கள் கலந்துகொண்டு தீ மிதித்து நேர்த்திக்கடன் செலுத்தினர். விழாவில் அள்ளூர் மற்றும் சுற்றியுள்ள கிராமத்தை சேர்ந்த பக்தர்கள் திரளாக கலந்து கொண்டனர். பக்தர்களுக்கு அன்னதானம் வழங்கப்பட்டது. இதற்கான ஏற்பாடுகளை விழா குழுவினர் மற்றும் கிராம மக்கள் செய்து இருந்தனர்.