இன்று முதல் வீடு வீடாக டோக்கன் வினியோகம்

பொங்கல் பரிசு தொகுப்பு பெற இன்று (செவ்வாய்க்கிழமை) முதல் வீடு வீடாக சென்று டோக்கன் வினியோகம் செய்யப்படும் என கலெக்டர் அருண்தம்புராஜ் தெரிவித்துள்ளார்.

இதுகுறித்து அவர் வெளியிட்டுள்ள செய்திக்குறிப்பில்:-

பொங்கல் பரிசு தொகுப்பு

தமிழர் திருநாளான தை பொங்கல் பண்டிகையை முன்னிட்டு நாகை மாவட்டத்தில் உள்ள அனைத்து ரேஷன் கடைகளிலும் அரிசி பெறும் அனைத்து குடும்ப அட்டைதாரர்களுக்கு 2023-ம் ஆண்டுக்கான பொங்கல் பரிசு தொகுப்பு வழங்கப்படுகிறது. இதில் 1 கிலோ பச்சரிசி, 1 கிலோ சர்க்கரை, ஒரு முழுக்கரும்பு மற்றும் ரூ.1000 ஆகியவை வழங்கப்படுகிறது.

வீட்டிற்கே சென்று டோக்கன்

இதற்கான முன்னேற்பாடாக பொதுமக்கள் சிரமமின்றி பொங்கல் பரிசு தொகுப்பினை பெற்றிட ஏதுவாக குடும்ப அட்டைதாரர்களுக்கு இன்று (செவ்வாய்க்கிழமை) முதல் வருகிற 8-ந்தேதி (ஞாயிற்றுக்கிழமை) வரை ரேஷன் கடை பணியாளர்கள் மூலம் நேரடியாக வீட்டிற்கே சென்று டோக்கன் வழங்கப்படும்.

தொடர்ந்து 9-ந்தேதி முதல் 13-ந்தேதி வரை அனைத்து அரிசி குடும்ப அட்டைதாரர்களுக்கு பொங்கல் பரிசு தொகுப்பு வழங்கப்பட உள்ளது. இவ்வாறு அதில் கூறப்பட்டுள்ளது.