முன்னாள் விளையாட்டு வீரர்கள் உதவித்தொகை பெற விண்ணப்பிக்கலாம்-கலெக்டர் தகவல்

நெல்லை மாவட்டத்தை சேர்ந்த முன்னாள் விளையாட்டு வீரர்கள் ஓய்வூதிய உதவித்தொகை பெற விண்ணப்பிக்கலாம் என மாவட்ட கலெக்டர் கார்த்திகேயன் தெரிவித்து உள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறி இருப்பதாவது;-

விளையாட்டு வீரர்கள்

விளையாட்டு துறையில் சர்வதேச தேசிய அளவிலான போட்டிகளில் வெற்றி பெற்று தற்போது நலிந்த நிலையில் உள்ள முன்னாள் சிறந்த விளையாட்டு வீரர்களுக்கு மாத ஓய்வூதியம் ரூ.6 ஆயிரம் வழங்கும் திட்டத்தின் கீழ் ஆன்லைன் மூலம் விண்ணப்பங்கள் வரவேற்கப்படுகிறது.

மத்திய அரசால் நடத்தப்பட்ட தேசிய அளவிலான பள்ளிகளுக்கு இடையேயான போட்டிகள், அகில இந்திய பல்கலைக்கழகங்களுக்கு இடையேயான போட்டி, இந்திய ஒலிம்பிக் சங்கத்தினால் அங்கீகரிக்கப்பட்ட தேசிய விளையாட்டு சம்மேளனங்களால் நடத்தப்பட்ட சர்வதேச, தேசிய அளவிலான போட்டி உள்ளிட்ட போட்டியில் கலந்து கொண்டிருக்க வேண்டும். சர்வதேச, தேசிய அளவிலான போட்டியில் முதல் இடம், 2-வது இடம், 3-வது இடம் பிடித்து இருக்க வேண்டும்.

விண்ணப்பம்

2023-ம் ஆண்டு ஜனவரி மாதம் 58 வயது பூர்த்தியடைந்தவராக இருக்க வேண்டும். தமிழகத்தை சேர்ந்தவராகவும், தமிழ்நாடு சார்பில் நடந்த போட்டிகளிலும் பங்கேற்று இருக்க வேண்டும். மாத வருமானம் ரூ.6 ஆயிரம் முதல் ரூ.15 ஆயிரத்துக்குள் இருக்க வேண்டும். முதியோருக்கான விளையாட்டு போட்டிகளில் வெற்றி பெற்றவர்கள் இந்த திட்டத்தின் கீழ் ஓய்வூதியம் பெற தகுதியில்லை.

விண்ணப்பங்களை தமிழ்நாடு விளையாட்டு மேம்பாட்டு ஆணையத்தின் இணையதளமான www.sdat.tn.gov.in மட்டுமே தங்களது சுய விவரம், சான்றிதழ்களை பதிவேற்றம் செய்து விண்ணப்பிக்க முடியும். விண்ணப்பிக்க வருகிற 19-ந்தேதி கடைசி நாளாகும்.

இவ்வாறு அதில் கூறப்பட்டுள்ளது.