முன்னாள் ராணுவவீரர் விபத்தில் பலி

ஓமலூர்:-

சேலம் மாரியம்மன் கோவில் தெரு பகுதியை சேர்ந்தவர் மாரியப்பன் (வயது 66), முன்னாள் ராணுவ வீரர். இவரது தோட்டம் ஓமலூர் அடுத்த தொளசம்பட்டி பகுதியில் உள்ளது. இந்த நிலையில் நேற்று முன்தினம் மாரியப்பன், தொளசம்பட்டியில் உள்ள தனது தோட்டத்திற்கு சென்று விட்டு மோட்டார் சைக்கிளில் சேலம் திரும்பி உள்ளார்.

அப்போது ஓமலூர் பஸ் நிலையம் அருகே தேசிய மயமாக்கப்பட்ட வங்கி ஒன்றின் அருகே சென்ற போது பின்னால் வந்த டிராக்டர் எதிர்பாராதவிதமாக மோதியது. இதில் டிராக்டரில் சிக்கி சம்பவ இடத்திலேயே அவர் பலியானார். விபத்து பற்றி தகவல் வந்த ஓமலூர் போலீசார் சம்பவ இடத்திற்கு விரைந்து சென்று மாரியப்பனின் உடலை மீட்டு பிரேத பரிசோதனைக்காக ஓமலூர் அரசு ஆஸ்பத்திரிக்கு அனுப்பி வைத்தனர். விபத்து குறித்து வழக்குப்பதிவு செய்து போலீசார் விசாரணை நடத்தி வருகின்றனர்.