ரூ.24 லட்சம் மோசடி செய்த வழக்கில் போலி பெண் சப்-இன்ஸ்பெக்டரின் கணவர் கைது

வியாபாரி உள்பட 3 பேரிடம் ரூ.24 லட்சம் மோசடி செய்த வழக்கில் போலி பெண் சப்-இன்ஸ்பெக்டரின் கணவரும் கைது செய்யப்பட்டார்.

ரூ.24 லட்சம் மோசடி

திருவள்ளூர் மாவட்டம் சுங்குவார்சத்திரத்தை சேர்ந்தவர் ரோகிணி (வயது 32). இவருக்கு கடந்த ஆண்டு ராணிப்பேட்டை மாவட்டம் ஆற்காடு இந்திராநகரை சேர்ந்த வியாபாரி தினேஷ்குமார் அறிமுகமானார். அப்போது ரோகிணி, தான் சென்னையில் போலீஸ் சப்-இன்ஸ்பெக்டராக பணிபுரிந்து வருவதாகவும், தற்போது பணியிடை நீக்கம் செய்யப்பட்டுள்ளதாகவும், போலீசாரால் பல்வேறு குற்றவழக்குகளில் பறிமுதல் செய்யப்படும் வாகனங்களை குறைந்த விலைக்கு விற்பனை செய்கிறேன் என்று தினேஷ்குமாரிடம் கூறி உள்ளார்.

இதனை உண்மை என்று நம்பிய தினேஷ்குமார் முதற்கட்டமாக 2 கார்கள் வேண்டும் என ரூ.2 லட்சத்தை ரோகிணியிடமும், ரூ.12 லட்சத்தை அவருடைய கணவர் சந்துருவின் வங்கிக்கணக்கிலும் செலுத்தி உள்ளார். சில நாட்களுக்கு பின்னர் நண்பர்களுக்கு 2 கார் தேவை என்று மேலும் ரூ.10 லட்சத்தை சந்துருவின் வங்கிக்கணக்கில் தினேஷ்குமார் செலுத்தினார். சில வாரங்கள் ஆகியும் ரோகிணி கூறியபடி கார்களை கொடுக்காமலும், உரிய பதில் தெரிவிக்காமலும் காலம் கடத்தி மோசடி செய்து வந்தார்.

சப்-இன்ஸ்பெக்டரின் கணவர் கைது

இதுகுறித்து தினேஷ்குமார் வேலூர் மாவட்ட குற்றப்பிரிவு போலீசில் புகார் அளித்தார். அதன்பேரில் போலீசார் வழக்குப்பதிந்து விசாரணை நடத்தினர். அதில், ரோகிணி சப்-இன்ஸ்பெக்டர் என்று கூறி நடித்து வாகனங்கள் வாங்கி தருவதாக பலரிடம் பண மோசடியில் ஈடுபட்டதும், அதற்கு அவருடைய கணவர் சந்துரு உடந்தையாக இருந்ததும் தெரிய வந்தது. இதையடுத்து ரோகிணியை கடந்த பிப்ரவரி மாதம் போலீசார் கைது செய்து வேலூர் மத்திய ஜெயிலில் அடைத்தனர்.

அவருடைய கணவர் சென்னை துண்டலம் திரு.வி.க.நகரை சேர்ந்த சந்துருவை (45) போலீசார் தீவிரமாக தேடி வந்தனர். இந்த நிலையில் அவர் ஸ்ரீபெரும்புத்தூர் அருகே உள்ள புதுப்பட்டியில் இருப்பதாக போலீசாருக்கு தகவல் கிடைத்தது. இதையடுத்து வேலூர் துணை போலீஸ் சூப்பிரண்டு பூபதிராஜன் தலைமையிலான போலீசார் சந்துருவை கைது செய்தனர்.