தவறி விழுந்த தொழிலாளி சாவு

வடமதுரை அருகே உள்ள பாடியூர் வேலம்பட்டியை சேர்ந்தவர் மோகன்ராஜ் (வயது 33), கூலித்தொழிலாளி. இவர் கடந்த 6-ந்தேதி தாமரைப்பாடியில் மளிகை சாமான் வாங்கிக்கொண்டு ஒரு மோட்டார் சைக்கிளில் ஊருக்கு வந்து கொண்டிருந்தார். திண்டுக்கல்-திருச்சி தேசிய நெடுஞ்சாலையில் கல்லாத்துப்பட்டி பாலம் அருகே திடீரென்று நிலை தடுமாறி மோட்டார் சைக்கிளில் இருந்து எதிர்பாராதவிதமாக கீழே விழுந்தார். இதில் படுகாயம் அடைந்தவரை அக்கம்பக்கத்தினர் மீட்டு திண்டுக்கல் அரசு மருத்துவமனையில் சேர்த்தனர். அதன்பின்னர் மோகன்ராஜ் மேல் சிகிச்சைக்காக மதுரை அரசு மருத்துவமனையில் சேர்க்கப்பட்டார். அங்கு அவர் சிகிச்சை பலனின்றி நேற்று பலியானார். இது குறித்து வடமதுரை போலீஸ் சப்-இன்ஸ்பெக்டர் அங்கமுத்து வழக்குப்பதிவு செய்து விசாரணை நடத்தி வருகிறார்.