மானிய விலையில் இடுபொருட்களை பெற உழவன் செயலியில் பதிவு செய்யலாம்

நெல்லுக்குப்பின் பயறு திட்டத்தின் கீழ் மானிய விலையில் இடுபொருட்களை உழவன் செயலியில் பதிவு செய்து கொள்ளலாம் என்று மாவட்ட வருவாய் அலுவலர் சிதம்பரம் தெரிவித்துள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

பச்சைப்பயறு சாகுபடி

வேளாண் விளைநிலங்களில் மண் வளத்தினை அதிகரிக்கவும். விவசாயிகளுக்கு குறைந்த செலவில் கூடுதல் வருமானம் கிடைத்திடவும், சம்பா நெல் அறுவடைக்குப்பின் உளுந்து, பச்சைப்பயறு சாகுபடி செய்திட நெல்லுக்குப்பின் பயறு திட்டம் அறிவிக்கப்பட்டு தமிழ்நாடு முழுவதும் 10 லட்சம் ஏக்கரில் செயல்படுத்தப்பட்டு வருகிறது.

திருவாரூர் மாவட்டத்தில், நெல்லுக்குப்பின் பயறு திட்டமானது 2 லட்சத்து 50 ஆயிரம் ஏக்கரில் சாகுபடி செய்யப்பட்டுள்ளது.

இந்த திட்டத்தின் கீழ் விவசாயிகளுக்கு ஒரு எக்ே்டருக்கு 20 கிலோ பயறு விதைகளுக்கு 50 சதவீத மானியத்தில் வழங்கப்படுகிறது.

308 டன் இருப்பு வைக்கப்பட்டுள்ளது

இந்த திட்டத்திற்காக வேளாண் விரிவாக்க மையங்களில் உளுந்து, பயறு விதைகள் 308 டன் இருப்பு வைக்கப்பட்டு, விவசாயிகளுக்கு வினியோகம் செய்யப்பட்டு வருகிறது.

வேளாண் விரிவாக்க மையங்களில் ரைசோபியம், பாஸ்போபாக்டீரியா போன்ற உயிர் உரங்கள், உயிரியல் கட்டுப்பாட்டு காரணிகளான டிரைக்கோடெர்மா விரிடி மற்றும் சூடோமோனாஸ், பயறுவகை பயிர்களுக்கு தேவையான நுண்ணூட்டங்கள் போன்ற இடுபொருட்கள் 50 சதவீதம் மானியத்தில் விவசாயிகளுக்கு வழங்கப்பட உள்ளது. இந்த திட்டத்தில் பயன்பெற விரும்பும் விவசாயிகள் உழவன் செயலியில் தேவைப்படும் இடுபொருட்களை பதிவு செய்து பெற்றுக் கொள்ளலாம்.

விதை நேர்த்தி

ஒரு கிலோ விதைக்கு கார்பன்டாசிம் 2 கிராம் என்ற அளவில் விதை நேர்த்தி செய்ய வேண்டும். கார்பன் டாசிம் விதை நேர்த்தி செய்த பின்பு 24 மணி நேர கால இடைவெளி அவசியம்.

ஒரு ஏக்கருக்கு தேவையான விதைகளுக்கு நுண்ணுயிர் உரங்களான ரைசோபியம் 200 கிராம், பாஸ்போபாக்டீரியா 200 கிராம் மற்றும் எதிர் பூஞ்சாண உயிர்கொல்லிகளான டிரைக்கோடெர்மா விரிடி 40 கிராம் அல்லது சூடோமோனாஸ் புளுரசன்ஸ் 100 கிராம் என்ற அளவில் குளிர்ந்த அரிசி கஞ்சியை பயன்படுத்தி விதை நேர்த்தி செய்து நிழலில் உலர்த்தி பின்பு விதைக்க வேண்டும்.

ஈரப்பதம்

பயிர் எண்ணிக்கையை பராமரிப்பதற்கு சரியான ஈரப்பதத்தில் விதைப்பது மிகவும் அவசியம். விதைகளை நெல் அறுவடைக்கு 7 முதல் 10 நாட்களுக்கு முன்பு சரியான ஈரப்பதத்தில் (மெழுகு பதத்தில்) நிலத்தில் தூவ வேண்டும்.

மேலும் விவரங்களுக்கு விவசாயிகள் தங்கள் வட்டார வேளாண்மை உதவி இயக்குனர் அலுவலகத்தை தொடா்பு கொள்ளலாம்.

இவ்வாறு அதில் கூறப்பட்டுள்ளது.