பட்டதாரி பெண் தூக்குப்போட்டு தற்கொலை

தற்கொலை

கரூர் மாவட்டம், குளித்தலை அருகே உள்ள மேலகுட்டப்பட்டி பகுதியைச் சேர்ந்தவர் சுந்தர்ராஜன் மகள் சிந்துஜா (வயது 23). பட்டதாரியான, இவருக்கு கடந்த சில ஆண்டுகளுக்கு முன்பு தலையில் அடிபட்டுள்ளதாக கூறப்படுகிறது.

இந்தநிலையில் நேற்று முன்தினம் இரவு வீட்டில் உள்ள அனைவரும் தூங்கிக் கொண்டிருந்தனர். பின்னர் நேற்று அதிகாலை சிந்துஜாவின் பெற்றோர் எழுந்து பார்க்கும் பொழுது அவர் வீட்டின் அருகே உள்ள வேப்பமரத்தில் தூக்கிட்டு தற்கொலை செய்து கொண்டது தெரியவந்தது. இதனால் மகளின் உடலை பார்த்து பெற்றோர் கதறி அழுதனர்.

போலீசார் விசாரணை

இதுகுறித்து குளித்தலை போலீசாருக்கு தகவல் தெரிவிக்கப்பட்டது. அதன்பேரில் போலீசார் சம்பவ இடத்திற்கு வந்து சிந்துஜாவின் உடலை கைப்பற்றி பிரேத பரிசோதனைக்காக குளித்தலை அரசு மருத்துவமனைக்கு கொண்டு சென்றனர்.

இதுகுறித்து சிந்துஜாவின் தந்தை சுந்தர்ராஜன் குளித்தலை போலீஸ் நிலையத்தில் புகார் கொடுத்தார். அதன்பேரில் போலீசார் வழக்குப்பதிவு செய்து அந்த பெண் எதற்காக தற்கொலை செய்து கொண்டார்? என்பது குறித்து தீவிர விசாரணை நடத்தி வருகின்றனர்.