கோபி வேளாண்மை அறிவியல் நிலையத்திற்கு எத்தியோப்பியா நாட்டு அமைச்சர் வருகை

கடத்தூர்

கோபி வேளாண்மை அறிவியல் நிலையத்துக்கு எத்தியோப்பியா நாட்டு அமைச்சர் வருகை தந்தார்.

எத்தியோப்பியா அமைச்சர்

கோபியை அடுத்த புதுவள்ளியாம்பாளையத்தில் வேளாண்மை அறிவியல் நிலையம் செயல்பட்டு வருகிறது இங்கு கோவை தமிழ்நாடு வேளாண்மை பல்கலைக்கழகம் சார்பில் எத்தியோப்பியா நாட்டு வேளாண்மை துறை அமைச்சர் மேல்ஸ் மேக்கோனன் இம்மர் மற்றும் அவருடன் 9 பேர் கொண்ட குழு விவசாயம் சார்ந்த செயல்பாடுகள் குறித்த தெரிந்து கொள்வதற்காக வந்திருந்தனர்.

எத்தியோப்பியா வேளாண்துறை அமைச்சர் மற்றும் அவருடன் வந்த 9 பேர் கொண்ட குழுவுக்கு நம்பியூர் வேளாண்மை உதவி இயக்குனர் ஜீவதயாளன் மற்றும் வேளாண் துறை அதிகாரிகள் மலர் கொத்து கொடுத்தும், மாலை அணிவித்தும், பாரம்பரிய நடனமாடியும் உற்சாக வரவேற்பளித்தனர்,

கண்காட்சி

அதன்பின்னர் வேளாண் அறிவியல் நிலையத்தின் வளாகத்தில் அமைக்கப்பட்டு இருந்த இயற்கை முறையில் விளைவித்த விவசாய பொருட்களின் கண்காட்சியினை குழுவினர் பார்வையிட்டனர்,

வேளாண்துறைகள் மூலம் திட்டங்களை எவ்வாறு நடைமுறைப்படுத்துவது, என்ன மாதிரியான இயற்கை உரங்கள் விவசாயத்திற்கு பயன்படுத்தப்படுகிறது, அதற்கு பயன்படுத்தும் தொழில்நுட்பங்கள், இயற்கை விவசாயம் செய்வது, அதன் மூலம் அதிக மகசூல் செய்ய அரசு சார்பில் வழங்கப்படும் வழிகாட்டு நெறிமுறைகள், வேளாண்துறை மற்றும் தமிழக அரசு விவசாயத்திற்கு எந்த மாதிரியான முக்கியத்துவம் வழங்கப்படுகிறது, விவசாயிகள் விளைவிக்கும் பொருட்களை சந்தைப்படுத்துதல் உள்ளிட்ட பல்வேறு செயல்பாடுகள் குறித்து எத்தியோப்பியா குழுவினர் கேட்டறிந்தார்கள்.