அய்யப்ப பக்தர்கள் சென்ற வேன் மோதி விவசாயி பலி

வேடசந்தூர் அருகே குட்டம் கரட்டுப்பட்டியை சேர்ந்தவர் ராமசாமி என்கிற கோவிந்தசாமி (வயது 65). விவசாயி. இன்று இவர், வேடசந்தூருக்கு மொபட்டில் சென்றார். பின்னர் அங்கிருந்து குட்டம் நோக்கி வந்து கொண்டிருந்தார். அப்போது எதிரே ராணிப்பேட்டை மாவட்டத்தை சேர்ந்த அய்யப்ப பக்தர்கள் 15 பேர் வேனில் வந்து கொண்டிருந்தனர். அவர்கள் சபரிமலை சென்று தரிசனம் முடித்துவிட்டு, பழனிக்கு வந்தனர்.

பின்னர் அங்கிருந்து வேடசந்தூர் வழியாக ராணிப்பேட்டைக்கு சென்று கொண்டிருந்தனர். வேனை ராணிப்பேட்டையை நோக்கி ராஜா (39) என்பவர் ஓட்டினார். இதற்கிடையே குட்டம் அருகே அவர்கள் வந்தபோது, முன்னால் வந்த ராமசாமியின் மொபட் மீது வேன் எதிர்பாராதவிதமாக மோதியது. இதில் மொபட்டில் இருந்து தூக்கி வீசப்பட்ட கோவிந்தசாமி சம்பவ இடத்திலேயே பலியானார்.

இதுகுறித்து தகவல் அறிந்த வேடசந்தூர் போலீஸ் சப்-இன்ஸ்பெக்டர் பாண்டியன் மற்றும் போலீசார் சம்பவ இடத்திற்கு சென்று, கோவிந்தசாமியின் உடலை கைப்பற்றி பிரேத பரிசோதனைக்காக வேடசந்தூர் அரசு மருத்துவமனைக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.