நிதி நிறுவன உரிமையாளரிடம் ரூ.1.20 லட்சம் மோசடி

அஞ்சுகிராமம்,

அஞ்சுகிராமம் அருகே வங்கியில் அடகு இருக்கும் நகையை மீட்டு தருவதாக கூறி நிதி நிறுவன உரிமையாளரிடம் ரூ.1.20 லட்சம் மோசடி செய்த வாலிபரை போலீசார் கைது செய்தனர்.

நிதி நிறுவன உரிமையாளர்

நாகர்கோவில் வடிவீஸ்வரத்தைச் சேர்ந்தவர் முருகன் (வயது55). இவர் கோட்டாரில் நிதி நிறுவனம் நடத்தி வருகிறார். அத்துடன் வங்கிகளில் திருப்ப முடியாமல் உள்ள அடகு நகைகளை மீட்டு வாங்குவது வழக்கம்.

இந்தநிலையில் கடந்த மாதம் 22-ந் தேதி முருகனின் செல்போனில் ஒரு நபர் தொடர்பு கொண்டு, 'எனது நகையை அஞ்சுகிராமத்தில் உள்ள ஒரு தனியார் வங்கியில் அடகு வைத்துள்ளேன். அதனை மீட்டு விற்பனை செய்ய ரூ.1 லட்சத்து 20 ஆயிரம் தேவை. நீங்கள் பணத்தோடு வந்தால் நகையை மீட்டு பெற்றுச்செல்லலாம்' என்றார்.

அந்த நபரின் பேச்ைச நம்பிய முருகன் பணத்துடன் அவர் கூறிய வங்கி முன்பு சென்றார். அப்போது அங்கு வந்த அந்த நபர் அவரிடம் பணத்தைப் பெற்றுக் கொண்டு, அவரை வௌியே காத்திருக்க சொல்லி விட்டு உள்ளே சென்றார்.

அதன்பின்பு அவர் திரும்ப வரவில்லை. முருகனை ஏமாற்றி விட்டு பணத்துடன் தப்பி சென்றார்.

போலீசில் புகார்

இதுகுறித்து முருகன் அஞ்சுகிராமம் போலீஸ் நிலையத்தில் புகார் செய்தார். அந்த புகாரின் அடிப்படையில் போலீசார் வழக்குப்பதிவு செய்து அந்த மர்ம நபரை தேடி வந்தனர். இந்தநிலையில் நேற்று அந்த நபர் அஞ்சுகிராமம் பஸ் நிலையத்தில் இருப்பதாக போலீசாருக்கு ரகசிய தகவல் கிடைத்தது. உடனே போலீசார் பஸ் நிலையத்திற்குச் சென்று அந்த நபரை பிடித்து போலீஸ் நிலையம் கொண்டு வந்து விசாரணை நடத்தினர்.

விசாரணையில் அவர் தூத்துக்குடி மாவட்டம் சிவராம மங்கலத்தை சேர்ந்த தாமஸ் மகன் ரிஷப் சங்கர் (25) என்பதும், முருகனிடம் பணம் வாங்க மோசடி செய்ததும் தெரிய வந்தது. இதையடுத்து அவரை போலீசார் கைது செய்து நாகர்கோவில் கோர்ட்டில் ஆஜர் படுத்தி சிறையில் அடைத்தனர்.