திருச்சியில் அரசு-தனியார் பஸ்கள் மோதல்

சேலத்தில் இருந்து நேற்று அதிகாலை அரசு மற்றும் தனியார் பஸ்கள் புறப்பட்டு திருச்சி நோக்கி வந்து கொண்டு இருந்தன. இரு பஸ்களிலும் 100-க்கும் மேற்பட்ட பயணிகள் இருந்தனர். இந்த பஸ்கள் திருச்சி-சென்னை பைபாஸ் சாலையில் இருந்து மாநகருக்குள் நுழைவதற்காக டி.வி.எஸ்.டோல்கேட் அருகே வந்தபோது, இரண்டு பஸ்களும் ஒன்றை ஒன்று முந்தி செல்வதில் போட்டி ஏற்பட்டது. இதில் தனியார் பஸ் அரசு பஸ்சின் பக்கவாட்டில் மோதியது. இதனால் பஸ்களை நடுவழியில் நிறுத்திவிட்டு இரு பஸ்களின் கண்டக்டர் மற்றும் டிரைவர்கள் கீழே இறங்கி வாக்குவாதத்தில் ஈடுபட்டனர். இதனால் அங்கு போக்குவரத்து பாதிக்கப்பட்டது. தகவல் அறிந்த கண்டோன்மெண்ட் போலீசார் அங்கு சென்று இரு தரப்பினரிடையே பேச்சுவார்த்தை நடத்தி அனுப்பி வைத்தனர். இந்த சம்பவத்தால் அங்கு சிறிதுநேரம் பரபரப்பு ஏற்பட்டது.