அரசு கலை அறிவியல் கல்லூரியில் மாணவர் சேர்க்கை கலந்தாய்வு

வந்தவாசி

வந்தவாசியை அடுத்த தென்னாங்கூரில் உள்ள அரசு கலை மற்றும் அறிவியல் கல்லூரி முதல்வர் கு.வெண்ணிலா வெளியிட்டுள்ள செய்திக்குறிப்பில் கூறி இருப்பதாவது:-

2023-24-ம் கல்வியாண்டின் இளங்கலை பட்டப்படிப்பிற்கான மாணவ-மாணவிகள் சேர்க்கைக்கான கலந்தாய்வு 30-ந் தேதி (செவ்வாய்க்கிழமை) தொடங்குகிறது.

இதில் 30-ந் தேதி முன்னாள் ராணுவ வீரர்களின் வாரிசுகள், மாற்றுத்திறனாளிகள், விளையாட்டு வீரர்கள் ஆகியோருக்கான சிறப்பு ஒதுக்கீட்டிற்கு கலந்தாய்வு நடைபெறுகிறது.

ஜூன் 2-ந் தேதி அறிவியல் பாடப்பிரிவுகளுக்கும், ஜூன் 5-ந் தேதி கலை பாடப்பிரிவுகளுக்கும் கலந்தாய்வு நடைபெறுகிறது.

கலந்தாய்வில் பங்கேற்கும் மாணவர்கள் மாற்று சான்றிதழ், மதிப்பெண் சான்றிதழ்கள், சாதி சான்றிதழ், ஆதார் அட்டை, வங்கி கணக்கு புத்தகம், சிறப்பு இட ஒதுக்கீட்டிற்கான சான்றிதழ் ஆகியவற்றின் அசல் மற்றும் நகல் சான்றிதழ்கள் மற்றும் விண்ணப்ப படிவ நகல், 5 பாஸ்போர்ட் அளவு புகைப்படங்கள் ஆகியவற்றுடன் காலை 9.30 மணிக்குள் கல்லூரிக்கு வர வேண்டும்.

இவ்வாறு அதில் கூறப்பட்டுள்ளது.