மோட்டார் சைக்கிள் மீது அரசு பஸ் மோதல்; 2 வாலிபர்கள் பலி

அரசு பஸ் மோதியது

புதுக்கோட்டை வடக்கு 3-ம் வீதியை சேர்ந்தவர் ரமேஷ். இவருடைய மகன் சீனிவாசன் என்கிற அய்யப்பன் (வயது 27). இவரது நண்பர் புதுக்கோட்டை மேல 4-ம் வீதியை சேர்ந்த முருகேசன் மகன் முத்துக்கருப்பன் (29). இவர்கள் இருவரும் நேற்று முன்தினம் நள்ளிரவில் மோட்டார் சைக்கிளில் சென்றனர். மோட்டார் சைக்கிளை அய்யப்பன் ஓட்டி சென்றார்.

புதுக்கோட்டை டவுன் போலீஸ் நிலையம் பகுதியில் நால்ரோடு அருகே வந்தபோது புதுக்கோட்டையில் இருந்து தஞ்சை நோக்கி சென்ற அரசு பஸ் எதிர்பாராதவிதமாக மோட்டார் சைக்கிள் மீது மோதியது.

2 வாலிபர்கள் பலி

இந்த விபத்தில் பலத்த காயம் அடைந்த அய்யப்பன் மற்றும் முத்துக்கருப்பன் ஆகியோர் சம்பவ இடத்திலேயே பரிதாபமாக இறந்தனர். இந்த விபத்து குறித்து தகவல் அறிந்த புதுக்கோட்டை டவுன் போலீசார் சம்பவ இடத்திற்கு விரைந்து சென்று 2 வாலிபர்களின் உடலையும் மீட்டு பிரேத பரிசோதனைக்காக புதுக்கோட்டை அரசு மருத்துவமனைக்கு அனுப்பி வைத்தனர்.

மேலும் விபத்திற்கு காரணமான அரசு பஸ் டிரைவர் புதுக்கோட்டையை சேர்ந்த சண்முகநாதனை பிடித்து விசாரணை நடத்தி வருகின்றனர்.