குருகுலம் அறக்கட்டளை நிறுவனர் நூற்றாண்டு பிறந்தநாள் விழா

வேதாரண்யம்,

வேதாரண்யம் கஸ்தூர்பா காந்தி கன்யா குருகுலத்தில் குருகுலம் அறக்கட்டளை நிறுவனர் மறைந்த அப்பாக்குட்டி பிள்ளையின் நூற்றாண்டு பிறந்தநாள் விழா பள்ளியின் பி.டி.ஏ. தலைவர் அரிகிருஷ்ணன் தலைமையில் நடந்தது. நகராட்சி தலைவர் புகழேந்தி, வர்த்தக சங்க மாநிலத்துணை தலைவர் தென்னரசு ஆகியோர் முன்னிலை வகித்தனர். விழாவில் புதுச்சேரி பாரதிதாசன் அரசு மகளிர் கலைக்கல்லூரி தமிழ் துறை தலைவர் டாக்டர் சேதுபதி, பேராசிரியர் பர்வீன் சுல்தானா ஆகியோர் பேசினர். இதில் தருமபுரம் ஆதீனம் மாசிலாமணி தேசிக ஞானசம்பந்த சுவாமிகள், மதுரை ஆதீனம் ஹரிஹர ஞானசம்பந்த சுவாமிகள், முன்னாள் அமைச்சர் ஓ.எஸ். மணியன், செல்வராஜ் எம்.பி., முன்னாள் எம்.பி. ராஜேந்திரன், முன்னாள் மாவட்ட கவுன்சிலர் கிரிதரன், ஊராட்சி ஒன்றியக்குழு தலைவர் கமலா அன்பழகன், நாகை மாவட்ட வர்த்தக சங்க தலைவர் வேதநாயகம், இலக்கிய பெருமன்ற நாகை மாவட்ட தலைவர் புயல் குமார், செங்கல்பட்டு தொழிலதிபர் தியாகராஜன், வக்கீல்கள் பாலச்சந்திரன், நமசிவாயம், பேச்சாளர் சிவசண்முகம், அரசு கலை அறிவியல் கல்லூரி பேராசிரியர் பிரபாகரன் மற்றும் பலர் கலந்து கொண்டனர். முன்னதாக அன்புகோர் அண்ணாச்சி நூல் ஆசிரியர் வீரையன், பதிப்பாளர் குருமூர்த்தி ஆகியோருக்கு பாராட்டு விழா நடைபெற்றது. தொடர்ந்து கோவை தியாகு குழுவினரின் சிறப்பு கலை நிகழ்ச்சிகளும், வேதாரண்யம் கோவில் ஆதின வித்வான் கேசவன் குழுவினரின் நாதஸ்வர இன்னிசை கச்சேரியும் நடந்தது. குருகுலம் அறக்கட்டளை நிர்வாக அறங்காவலர் கயிலை மணி வேதரத்னம் வரவேற்றார். முடிவில் அலுவலர் ஸ்ரீதர் நன்றி கூறினார். இதற்கான ஏற்பாடுகளை குருகுலம் கல்வியியல் கல்லூரி நிர்வாகி கேடிலியப்பன் தலைமையிலான குழுவினர் செய்திருந்தனர்.