காரில் கடத்தி வந்த 125 கிலோ குட்கா பறிமுதல்

ஓசூர்:

வாகன சோதனை

ஓசூர் சிப்காட் போலீசார் பேகேப்பள்ளி பகுதியில் நேற்று முன்தினம் வாகன சோதனையில் ஈடுபட்டனர். அப்போது அந்த வழியாக வந்த காரை நிறுத்தி சோதனை செய்தனர். அதில் 125 கிலோ தடை செய்யப்பட்ட ஹான்ஸ், பான்மசாலா, குட்கா ஆகியவை இருந்தது தெரிய வந்தது.

இதுதொடர்பாக போலீசார் கார் டிரைவர் மற்றும் உடன் வந்தவர்களிடம் விசாரணை நடத்தினர். அவர்கள் சேலம் மாவட்டம் சங்ககிரி தாலுகா கத்தேரி கருக்கன்காடு தெருவை சேர்ந்த சக்திவேல் (வயது 29), சேலம் மாவட்டம் சித்தனூரை சேர்ந்த வசந்த் (27) என்பதும், பெங்களூருவில் இருந்து சேலத்திற்கு குட்கா கடத்தி வந்ததும் தெரிய வந்தது.

2 பேர் கைது

இதையடுத்து அவர்கள் 2 பேரையும் போலீசார் கைது செய்தனர். அவர்களிடம் இருந்து ரூ.83 ஆயிரம் மதிப்புள்ள 125 கிலோ குட்கா மற்றும் கார் பறிமுதல் செய்யப்பட்டது. தொடர்ந்து விசாரணை நடந்து வருகிறது.