உடையார்பாளையம் பகுதியில் சூறாவளி காற்றுடன் பலத்த மழை

அரியலூர் மாவட்டம் உடையார்பாளையம் பகுதிகளில் கடந்த ஒரு வார காலமாக வெயிலின் தாக்கம் அதிகமாக இருந்தது. இந்தநிலையில் நேற்று வெயில் தாக்கம் குறைந்து, மாலை குளிர்ந்த காற்று வீசத்தொடங்கியது. பின்னர் கருமேகம் சூழ்ந்து சூறாவளி காற்றுடன் பலத்த மழை பெய்தது. இந்த மழை உடையார்பாளையம், கழுமங்கலம், முனியத்திரையான்பட்டி, தத்தனூர், மனகெதி, வெண்மான்கொண்டான், விளாங்குடி, ஆதிச்சனூர், சுத்தமல்லி, கச்சிப்பெருமாள், துலாரங்குறிச்சி, சூரியமணல், இடையார், நடுவலூர், காடுவெட்டாங்குறிச்சி பருக்கல் உள்ளிட்ட பல்வேறு பகுதிகளில் சூறாவளி காற்றுடன் பலத்த மழை பெய்தது. இந்த மழையால் பொதுமக்கள் மற்றும் விவசாயிகள் மகிழ்ச்சி அடைந்தனர்.தா.பழூர் சுற்றுவட்டார பகுதிகளில் நேற்று பகல் முழுவதும் கடுமையான வெப்பம் நிலவியது. மாலை 4 மணியளவில் திடீரென புழுதியுடன் காற்று வீசத் தொடங்கியது. சிறிது நேரத்தில் கருமேகங்கள் திரண்டு மாலை 6 மணி முதல் லேசான சாரல் மழை பெய்தது. பின்னர் சற்று வலுப்பெற்று 1 மணி நேரம் மழை பெய்ததால் பொதுமக்கள் மகிழ்ச்சி அடைந்தனர்.