மனைவியை வெட்டிக் கொலை செய்த கணவர் கைது

தூத்துக்குடியில் அரிவாளால் வெட்டி மனைவியை கொலை செய்த கணவர் கைது செய்யப்பட்டார்.

அரிவாள் வெட்டு

தூத்துக்குடி கிருஷ்ணராஜபுரத்தைச் சேர்ந்தவர் ஜெயமுருகன் (வயது 74). முத்துகிருஷ்ணாபுரத்தில் பார் ஊழியராக வேலை பார்த்து வருகிறார். இவரது மனைவி சுதந்திரகனி (60). இவர்களுக்கு 4 மகன்கள், ஒரு மகள் உள்ளனர். அனைவருக்கும் திருமணமாகி வெளியூர்களில் வசித்து வருகின்றனர். ஜெயமுருகனுக்கு குடிப்பழக்கம் இருந்து வந்தது. தினமும் மது குடித்துவிட்டு வீட்டுக்கு வந்தாராம். இதனை மனைவி கண்டித்து உள்ளார். கடந்த 11-ந் தேதி குடித்து விட்டு வந்த ஜெயமுருகனை, மனைவி சுதந்திரகனி கண்டித்த போது அவர்களுக்கு இடையே தகராறு ஏற்பட்டது. இதில் ஆத்திரம் அடைந்த ஜெயமுருகன், சுதந்திரகனியை அரிவாளால் வெட்டினார். இதில் படுகாயம் அடைந்த சுதந்திரகனி, தூத்துக்குடி அரசு ஆஸ்பத்திரியில் சிகிச்சை்ககாக சேர்க்கப்பட்டார்.

கொலை வழக்கு

இது குறித்து தூத்துக்குடி வடபாகம் போலீஸ் சப்-இன்ஸ்பெக்டர் சிவராஜா கொலை முயற்சி வழக்கு பதிவு செய்து ஜெயமுருகனை கைது செய்தார். இந்த நிலையில் சிகிச்சை பெற்று வந்த சுதந்திரகனி, சிகிச்சை பலன் அளிக்காமல் நேற்று காலை பரிதாபமாக இறந்தார். இதனால் ஜெயமுருகன் மீது பதிவு செய்யப்பட்ட கொலை முயற்சி வழக்கை, கொலை வழக்காக மாற்றி பதிவு செய்து விசாரணை நடத்தி வருகின்றனர்.