தனியார் நிறுவன ஊழியருக்கு 28 மாதம் சிறை தண்டனை

சேலம் கன்னங்குறிச்சி ராமநாதபுரம் பகுதியை சேர்ந்தவர் மணிகண்டன் (வயது 43). இவர் தனியார் நிறுவனம் ஒன்றில் ஊழியராக வேலை பார்த்து வந்தார். இவர் கடந்த 2014-ம் ஆண்டு அதே பகுதியை சேர்ந்த திலகவதி (63) என்பவரை தாக்கி கொலை மிரட்டல் விடுத்ததாக கூறப்படுகிறது. இதுதொடர்பான புகாரின் பேரில் கன்னங்குறிச்சி போலீசார், மணிகண்டனை கைது செய்தனர்.

இதுதொடர்பான வழக்கு விசாரணை சேலம் ஜூடிசியல் 4-வது மாஜிஸ்திரேட்டு கோர்ட்டில் நடந்தது. இந்த வழக்கில் நேற்று தீர்ப்பு கூறப்பட்டது. இதில் மணிகண்டனுக்கு 28 மாதம் சிறை தண்டனை விதித்து மாஜிஸ்திரேட்டு யுவராஜ் தீர்ப்பு அளித்தார்.