வெவ்வேறு விபத்துகளில்போலீஸ்காரர் உள்பட 2 பேர் பலி

போலீஸ்காரர் சாவு

வீரபாண்டி அருகே உள்ள தர்மாபுரி நடுத்தெருவை சேர்ந்தவர் சுந்தரமகாலிங்கம் (வயது 38). இவர், ஓடைப்பட்டி போலீஸ் நிலையத்தில் போலீஸ்காரராக பணிபுரிந்து வந்தார். கடந்த மாதம் 30-ந்தேதி இவர், வெளியூர் சென்றுவிட்டு மோட்டார்சைக்கிளில் வீட்டிற்கு வந்தார். வீட்டின் அருகே வந்தபோது திடீரென மோட்டார்சைக்கிளில் இருந்து தவறி கீழே விழுந்தார். இதில் அவருக்கு தலையில் பலத்த காயம் ஏற்பட்டது.

பின்னர் உறவினர்கள் அவரை மீ்ட்டு சிகிச்சைக்காக சின்னமனூர் அரசு ஆஸ்பத்திரியில் சேர்த்தனர். அங்கிருந்து மேல் சிகிச்சைக்காக அவர் மதுரை ராஜாஜி அரசு மருத்துவமனைக்கு கொண்டு செல்லப்பட்டார். அங்கு சிகிச்சை பலனின்றி நேற்று முன்தினம் அவர் பரிதாபமாக இறந்தார். இதுகுறித்து வீரபாண்டி போலீசார் வழக்குப்பதிவு செய்து விசாரணை நடத்தி வருகின்றனர்.

டிரைவர் மீது வழக்கு

தேவதானப்பட்டி அருகே உள்ள சில்வார்பட்டியை சேர்ந்தவர் முத்தையா (40). கூலித்தொழிலாளி. கடந்த மாதம் 31-ந்தேதி இவர், தனது நண்பர் பாண்டியராஜனுடன் தேவதானப்பட்டிக்கு மோட்டார்சைக்கிளில் சென்று கொண்டிருந்தார். மோட்டார்சைக்கிளை பாண்டியராஜன் ஓட்டினார். பெரியகுளம்- வத்தலக்குண்டு பைபாஸ் சாலையில் வைகை அணை பிரிவு அருகே சென்றபோது, எதிரே வந்த கார் இவர்களது மோட்டார்சைக்கிள் மீது மோதியது.

இதில் தூக்கி வீசப்பட்டதில் 2 பேரும் படுகாயம் அடைந்தனர் அக்கம்பக்கத்தினர் அவர்களை மீட்டு சிகிச்சைக்காக தேனி அரசு மருத்துவ கல்லூரி மருத்துவமனையில் சேர்த்தனர். அங்கு சிகிச்சை பலனின்றி நேற்று முன்தினம் முத்தையா பரிதாபமாக இறந்தார். பாண்டியராஜனுக்கு சிகிச்சை அளிக்கப்பட்டு வருகிறது. இந்த விபத்து குறித்து தேவதானப்பட்டி போலீசார் பெரியகுளத்தை சேர்ந்த கார் டிரைவரான சரவணன் மீது வழக்குப்பதிவு செய்து விசாரணை நடத்தி வருகின்றனர்.