குலசேகரன்பட்டினத்தில்கடைக்காரரை தாக்கியவர் கைது

குலசேகரன்பட்டினம்:

குலசேகரன்பட்டினம் முப்புடாரி அம்மன் கோவில் தெருவைச் சேர்ந்த பரமசிவன் மகன் பன்னீர்பெருமாள் (வயது 39). இவர் முத்தாரம்மன் கோவில் முன்பு பேன்சி கடை நடத்தி வருகிறார். இவருக்கும் எதிர்வீட்டில் வசிக்கும் நம்பிக்கோனார் மகன் இசக்கிமுத்துவுக்கும் இடையே முன்விரோதம் இருந்து வருவதாக கூறப்படுகிறது. இந்த நிலையில் சம்பவத்தன்று மதியம் பன்னீர்பெருமாள் கடையில் இருந்தார். அங்கு வந்த இசக்கிமுத்து திடீரென்று அவரை கம்பியால் தாக்கியுள்ளார். இதில் பலத்த காயமடைந்த பன்னீர்பெருமாளை அக்கம் பக்கத்தினர் மீட்டு திருச்செந்தூர் அரசு மருத்துவமனையில் சேர்த்தனர். அங்கு அவர் சிகிச்சை பெற்று வருகிறார். இதுகுறித்த புகாரின் பேரில் குலசேகரன்பட்டினம் போலீசார் வழக்குப்பதிவு செய்து இசக்கிமுத்துவை கைது செய்தனர்.