பெரியதாழை கடலில் 2 மூட்டை பீடி இலைகள் மீட்பு

தட்டார்மடம்:

தட்டார்மடம் அருகே உள்ள பெரியதாழை கடல் பகுதியில் நேற்று மீனவர்கள் கடலுக்கு மீன் பிடிக்க சென்றனர். அப்போது அப்பகுதியில் உள்ள கடலில் 2 மூட்டைகளில் மர்ம பொருள்கள் மிதந்து கொண்டு இருந்தது. இதுகுறித்து மீனவர்கள் திருச்செந்தூர் கடலோர பாதுகாப்பு போலீசாருக்கு தகவல் தெரிவித்தனர்.

அதன்பேரில் சம்பவ இடத்திற்கு சென்ற அந்த போலீசார் படகில் சென்று அந்த 2 மூட்டைகளை மீட்டு கடற்கரைக்கு கொண்டு வந்தனர். அந்த மூட்டைகளை பிரித்து சோதனை நடத்தியபோது தலா 40 கிலோ பீடி இலைகள் இருந்தது கண்டுபிடிக்கப்பட்டது. இந்த பீடி இலைகளுக்கு இலங்கையில் கிராக்கி இருப்பதாக கூறப்படுகிறது.

இதனால் மர்ம நபர்கள் படகில் பீடி இலை மூட்டைகளை இலங்கைக்கு கடத்த முயன்றபோது, கடலோர பாதுகாப்பு போலீசாரை பார்த்து கடலில் வீசி சென்றிருக்கலாம் என்று சந்தேகிக்கின்றனர். இதுகுறித்து திருச்செந்தூர் கடலோர பாதுகாப்பு போலீசார் வழக்குப்பதிவு செய்து பீடி இலைகளை கடத்தியவர்கள் யார்? என்று தீவிர விசாரணை நடத்தி வருகின்றனர்.