திருச்செந்தூரில்சி.பா.ஆதித்தனார் பிறந்த நாள் விழா

திருச்செந்தூர்:

'தமிழர் தந்தை' சி.பா.ஆதித்தனார் 119-வது பிறந்த நாள் விழா நேற்று கொண்டாடப்பட்டது. இதையொட்டி திருச்செந்தூர் ஆதித்தனார் கல்லூரி வளாகத்தில் உள்ள அவரது திருவுருவ சிலைக்கு கல்லூரி நிர்வாகம் சார்பில் மாலை அணிவித்து மரியாதை செலுத்தப்பட்டது. ஆதித்தனார் கல்வி நிறுவன மேலாளர் வெங்கட் ராமராஜ் தலைமை தாங்கினார். சி.பா.ஆதித்தனாரின் சிறப்புகள் குறித்து பேராசிரியர் மருதையா பாண்டியன் பேசினார்.

தொடர்ந்து சபாநாயகராக சி.பா.ஆதித்தனார், கூட்டுறவு துறை அமைச்சராக சி.பா.ஆதித்தனார், இந்தியாவின் வளர்ச்சியில் மாணவர்களின் பங்கு, கல்வி பணியில் சி.பா.ஆதித்தனார் ஆகிய தலைப்புகளில் நடத்தப்பட்ட பேச்சு, கட்டுரை போட்டியில் வெற்றி பெற்ற மாணவர்களுக்கு ஆதித்தனார் கல்வி நிறுவன மேலாளர் வெங்கட் ராமராஜ் பரிசுகளை வழங்கினார்.

விழாவில் ஆதித்தனார் கல்வி நிறுவன செயலாளர் நாராயணராஜன், ஆதித்தனார் கல்லூரி செயலாளர் ஜெயக்குமார், கல்லூரி முதல்வர் மகேந்திரன், கோவிந்தம்மாள் ஆதித்தனார் மகளிர் கல்லூரி முதல்வர் ஜெயந்தி, டாக்டர் சிவந்தி ஆதித்தனார் என்ஜினீயரிங் கல்லூரி முதல்வர் வைஸ்லின் ஜிஜி, டாக்டர் சிவந்தி ஆதித்தனார் கல்வியல் கல்லூரி முதல்வர் சுவாமிதாஸ், டாக்டர் சிவந்தி ஆதித்தனார் உடற்கல்வியியல் கல்லூரி முதல்வர் சாம்ராஜ், டாக்டர் சிவந்தி ஆதித்தனார் ஆசிரியர் பயிற்சி நிறுவன முதல்வர் மரிய செசிலி, பத்மஸ்ரீ டாக்டர் சிவந்தி ஆதித்தனார் நர்சிங் கல்லூரி முதல்வர் கலைக்குரு செல்வி, சிவந்தி அகாடமி ஒருங்கிணைப்பாளர் பிரான்சிஸ் ரெஜீலா மற்றும் பேராசிரியர்கள், அலுவலர்கள், மாணவ-மாணவிகள் கலந்து கொண்டனர். அனைவருக்கும் இனிப்பு வழங்கப்பட்டது.