வெவ்வேறு விபத்துகளில் பள்ளி மாணவன் உள்பட 4 பேர் காயம்

பாப்பிரெட்டிப்பட்டி:

பாப்பிரெட்டிப்பட்டி வெங்கடசமுத்திரம் பகுதியை சேர்ந்தவர் சிராஜ் பாஷா. இவருடைய மனைவி நசிமா (வயது 28). இவர் பாப்பிரெட்டிப்பட்டி மின் வாரிய அலுவலக பஸ் நிறுத்தத்தில் பெட்டிக்கடை நடத்தி வருகிறார்.

இந்த தம்பதி மகன் அரபவத் (14). இவன் அரசு பள்ளியில் 9-ம் வகுப்பு படித்து வருகிறான். நேற்று முன்தினம் இரவு அரபத், நசிமாவை அழைத்து வர மோட்டார் சைக்கிளில் பாப்பிரெட்டிப்பட்டிக்கு சென்றான். வழியில் கன்னடதாதம்பட்டியை சேர்ந்த கலையரசன் என்பவர் ஓட்டி வந்த மோட்டார் சைக்கிள், அரபவத் மோட்டார் சைக்கிள் மீது மோதியது. இதில் கீழே விழுந்து அவர்கள் 2 பேரும் படுகாயம்அடைந்தனர். அவர்களை அந்த வழியாக சென்றவர்கள் மீட்டு சிகிச்சைக்காக பாப்பிரெட்டிப்பட்டி அரசு ஆஸ்பத்திரிக்கு அனுப்பி வைத்தனர்.

இதேபோல் திப்பிரெட்டிஅள்ளி சந்தனூர் மேடு பகுதியை சேர்ந்த கல்லூரி மாணவர் பாரத் (20), தனது நண்பர் ஹரிகிருஷ்ணனுடன் நடூரில் உள்ள உடற்பயிற்சி நிலையத்துக்கு மோட்டார் சைக்கிளில் சென்று கொண்டிருந்தார். அப்போது எதிரே வந்த மற்றொரு மோட்டார் சைக்கிள் மீது, பாரத் சென்ற மோட்டார் சைக்கிள் எதிர்பாராத விதமாக மோதியது. இதில் பாரத், ஹரிகிருஷ்ணன் ஆகியோர் கீழே விழுந்து படுகாயம் அடைந்தனர். இந்த விபத்துகள் குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.