கல்லூரி மாணவர்களுக்கு தொல்லியல் உள்விளக்க பயிற்சி

கிருஷ்ணகிரி மாவட்ட அரசு அருங்காட்சியகத்தில் கடந்த மாதம் 31-ந் தேதி முதல் 15 நாட்களுக்கு கிருஷ்ணகிரி அரசு மகளிர் கலைக்கல்லூரியில் பி.ஏ. வரலாறு, தமிழ் இலக்கியம் 3-ம் ஆண்டு, அரசு மகளிர் கலை, அறிவியல் கல்லூரியின் பி.ஏ. 3-ம் ஆண்டு வரலாறு, அறிஞர் அண்ணா கல்லூரி பி.ஏ. 3-ம் ஆண்டு வரலாறு, தமிழ் இலக்கியம் படிக்கும் 106 மாணவ, மாணவிகளுக்கு தொல்லியல் குறித்த உள்விளக்க பயிற்சி நடந்து வருகிறது.

5-ம் நாளான நேற்று பழையபேட்டை சோமேஸ்வரர் கோவிலுக்கு மாணவ, மாணவிகளை அழைத்து சென்று கோவிலின் கட்டிடக்கலை, சிற்பங்கள் குறித்து செயல்விளக்க பயிற்சி அளிக்கப்பட்டது. முன்னதாக வரலாற்றுக்கு முற்பட்ட காலம், இடைக்காலம் மற்றும் வரலாற்று காலங்கள் குறித்து விளக்கம் அளிக்கப்பட்டது. மேலும் தமிழி என்று அழைக்கப்படும் 2,000 ஆண்டுகளுக்கு முற்பட்ட தமிழ் பிராமி எழுத்துக்களை எழுதவும், படிக்கவும் கற்று தரப்பட்டது. பின்னர் அந்த எழுத்தில் இருந்து இன்றைய கால தமிழ் வரை எழுத்துக்களின் வளர்ச்சியை எடுத்துக்காட்டுகளுடன் விளக்கப்பட்டது.

வரும் நாட்களில் கிரந்த எழுத்துக்கள், தமிழ் எண்கள், கல்வெட்டுகளில் உள்ள ஆண்டுகளை கணக்கிடும் முறை, சிற்பம் குறித்து பயிற்சி அளிக்கப்பட உள்ளது. இப்பயற்சியினை அரசு அருங்காட்சியக காப்பாட்சியர் கோவிந்தராஜ் அளிக்கிறார். பயிற்சியின்போது கிருஷ்ணகிரி வரலாற்று ஆய்வு மற்றும் ஆவணப்படுத்தும் குழு ஒருங்கிணைப்பாளர் தமிழ்செல்வன், கோவில் பூசாரி நாகராஜ் ஆகியோர் உடனிருந்தனர். ஏற்பாடுகளை அருங்காட்சியக பணியாளர்கள் செல்வகுமார் மற்றும் பெருமாள் ஆகியோர் செய்திருந்தனர்.